عمر كمال عن فشل كليب أوعدك: سمية الخشاب تكاسلت (فيديو)
كشف المطرب عمر كمال تفاصيل خلافه مع الفنانة سمية الخشاب على كليب أغنيتهما أوعدك، التي لم يلق الفيديو كليب الخاص بها نجاحًا كبيرًا مثل نجاح الأغنية عند الترويج لها، مشيرًا إلى أن عدم النجاح يعود لتكاسل سمية الخشاب.
وقال عمر كمال خلال حواره مع المذيع نزار الفارس على قناة الرشيد العراقية: “مطلعتش قولت أنا نجحت بالعكس أنا انتقدت نفسي.. قولت إن عندنا ديفوهات وأثرت على الأغنية.. اجتهدت وعملت أوديو محترم”.
وأضاف: “في جانب وطرف تاني كان مسئول عن الكليب وأنا اتعاونت على قد ما أقدر ومطلعش بالصورة اللي عايزها خالص وأخد نقد سلبي وبعد ما نزلنا الأغنية كسرت الدنيا معنى كدا إن الناس مستنية ولما عملت البرومو أخد تريند رقم 1”.
وتابع: “مكناش متفقين على كليب ولما نجحنا قولتلها تعالي نصور وهي تكاسلت في النقطة دي ومعرفش ليه وبلغتها بالكلام دا وعاتبتها ورسمت ستوري بورد فطبيعي الناس شافت صورة مش بجودة عالية والناس طلعت قالت كليب بربع جنيه وناس تانية مأجرين عربية وواقفين جمبها وخايفين يمشوا”.
وأضاف عمر كمال: “عدم تعاونها معايا أثر.. وأنا مبحبش المقارنة واحنا شغالين على الأغنية من 4 شهور من قبل ما ينزل مسلسل البرنس، وفي نفس الوقت كانت ياسمين رئيس خارجة من مسلسل ملوك الجدعنة فحصل عند الناس منافسة بيني وبين حسن شاكوش”.
وتحدث عمر كمال عن خلافه مع حمو بيكا قائلًا: “وحمو بيكا غلط فيا لتاني مرة وماتمشيش معايا بمبدأ ولا تقربوا الصلاة.. أنا أكتر واحد في الدنيا قلبه أبيض وأكتر واحد طيّب وأقف في ضهر حمو بيكا وربنا يسهله في حياته.. وحمو بيكا ضافلي لكن مش صاحب فضل عليا وأكتر واحد بيكلم النقابة على حمو بيكا هو عمر كمال، وأكتر واحد بيشارك معايا في شغلي".
واختتم عمر كمال حديثه قائلًا: “الراجل دا مبيغنيش الراجل دا مؤدي ومش مطلوب منه في المهرجانات إنه يغني المطلوب بس إنه يؤدي.. اللي زعلني إن حمو طالع يعيب فيا وهما الناس مفهمينه غلط وأكتر واحد في مصر عاشر حمو بيكا هو أنا.. وعايز أقول للناس إن مش كل حاجة تظلموه وتحطوه في خانة الطرب هو مش مطلوب منه يغني هو راجل مؤدي ناجح وجمهوره كبير، واللي بيقوله بيكا محدش في حتة تانية يقدر يعمله وبيكا بقى براند في المهرجانات وعمل بصمة وشكل.. ومبحبش اللي في خصومته بيجرّح".
