الجمعة 29 مارس 2024
المشرف العام
محمود المملوك
رئيس التحرير
مروان قراعة
المشرف العام
محمود المملوك
رئيس التحرير
مروان قراعة

شهامة مواطن أنقذ سيدة من الغرق بالفيوم: نطيت من الكوبري وقولت أهم حاجة اطلعها

أنقذ المواطن أيمن فكري بركات، وهو من منشأة عبدالله، التابعة لمركز الفيوم، سيدة من الغرق في بحر تنهلة بمحافظة الفيوم، رغم معاناته من الإصابة بقدميه وتركيبه عدد من المسامير والشرائح بها، إلا أنه لم يتردد لحظة في إنقاذ هذه السيدة.

قال أيمن فكري: كنت قاعدة عند محل واحد صاحبي، ولقيت فاجأة ناس بتصوت، سألت في إيه قالولي ده في واحدة وقعت في البحر، قولتلتهم خلاص أنا هطلعها ونطيت من فوق الكوبري، وقولت إللي يحصل يحصل.. قولت أهم حاجة اطلع الست دي عشان عيالها البنات كانوا بيعيطوا.

وأضاف أيمن: لما نزلت لقيتها مقلوبة في المياه على وشها، طلعتها على الرصيف وغطيتها بالجلابية بتاعتي، وفضلت أدوس على بطنها لحد ما طلعت المياه من بوقها، وطلبت من الناس يساعدوني عشان نشدها ونطلعها من على الرصيف عشان كان عالي.

وأوضح، أنه وجد مع السيدة مبلغًا من المال وعِدة مفاتيح كانوا في قبضة يديها، قائلا: جوزها جيه بعدها بشوية واديته الفلوس والمفاتيح اللي كانت معاها، رغم أن في واحد نزل المياه في الآخر عشان يساعدني، وكان عاوز يأخذ الفلوس إللي مع الست، بس أنا خبطته بكوعي وقولتله لا ما ينفعش حرام أحنا معانا ولايا.

لم تكن هذه هي حالة الإنقاذ الأولى للمواطن أيمن فكري بركات، مشيرًا إلى أنه أنقذ طفلة من الغرق في نفس البحر، منذ أكثر من شهر.

وأفاد أيمن فكري: كان في بنت ماشية مع والدتها وقالتلها أنا عاوزة أشرب، ووالدتها سابتها ومشيت واتزحلقت البنت من على الكوبري ووقعت في البحر، ونزلت طلعتها وخدتها من نص البحر، وجريت بيها على مستشفى الفيوم العام ورجلي كانت وجعاني وقتها، ووديتها المستشفى عشان كنت خايف عليها عشان هي نزلت تحت في المياه خالص حتى الناس قعدوا يقولولي بلاش دي غريق، بس والدتها كانت عمالة تصوت وتقول بنتي وقعت هنا.