كابتن منار: بحلم أعلم البنات ركوب العجل.. وأخليهم واثقين في نفسهم

تعمل الطالبة الجامعية منار يحيي، والبالغة من العمر 22 عامًا، كمدربة عجل في إحدى النوادي، واعتبرت أن ركوب العجل لا يُعيب الفتاة في أي شيء.

وقالت منار يحيى: كنت بركب العجل وأنا طفلة بعد كدا انقطعت عنها، لكن الفكرة جاءت في دماغي من سنة ونص، بعد كدا كان ليا صديق على الفيس بوك رشحلي جروب لتعليم ركوب العجل ودخلت فيه.

واستكملت مدربة العجل حديثها قائلة: بعد كدا بقيت مدربة وباجي النادي اقضي نص اليوم بدرب البنات على ركوب العجل وأخليهم واثقين من نفسهم وهما راكبين العجل وميرتبكوش، وطبعًا دا بيختلف من شخص لشخص علي حسب مدى المعرفة اللي عند كل واحدة فيهم، وبردوا علي حسب نوع العجل اللي بتركبها.

وعن تطلعاتها إلى المستقبل، قالت منار: أنا بحلم إني اعلم كل البنات ازاي تركب عجل.

كما أوضحت الشابة ملك، وهي إحدى المتدربات، والتي تبلغ من العمر 17 عامًا: أنا كان نفسي من زمان ألاقي أي حاجة أتنقل بيها لحد ما اتعرفت على كابتن منار واتعلمت اسوق العجلة وطبعًا الطريقة اللي بسوق بيها دلوقتي غير الطريقة اللي كنت بسوق بيها وأنا لوحدي؛ لأني اتعلمت حاجات كتير.