مدير فرع الأهلي بالجزيرة: الأعضاء توافدوا من بعد الفجر والإقبال كبير جدًا
تحدث خالد مرسي، مدير فرع النادي الأهلي بالجزيرة، عن سير العملية الانتخابية هناك، بالتزامن مع توافد أعضاء الجمعية العمومية، للمشاركة في انتخاب مجلس إدارة جديد.
قال مدير فرع النادي الأهلي بالجزيرة: بداية من بعد الفجر، الأعضاء بدأوا يتوافدوا على مقر النادي، مفيش أي تكدس، إحنا عاملين حساب الممرات، فيه إقبال كبير جدًا، ودي عادة جماهير النادي الأهلي، هما بيختاروا بإيديهم المجلس اللي هيجي.
تابع خالد مرسي في تصريحات تلفزيونية: إحنا بقالنا يومين مبنروّحش، وبشكر الدكتور سعد شبلي، المدير التنفيذي للنادي، وإحنا دورنا يقتصر على تنظيم الانتخابات فقط.
انتخابات الأهلي
وتابع خالد مرسي: عاملين باب دخول للأعضاء عشان يكون في سهولة لدخول العضو، كمان في إرشادات داخل اللجان الانتخابية، كل عضو بيعرف من مكان الاستعلام رقم اللجنة وبيتوجه مباشرة للانتخاب.
وأوضح مرسي: موجود علاقات عامة عشان تسهل على العضو، اللي بيختار بسهولة ويسر القائمة اللي هو عايز ينتخبها، أعضاء النادي مش محتاجين نقولهم، هما عندهم وعي كبير جدًا لمصلحة ناديهم، وموجود 4 بوابات طوارئ غير بوابات الدخول والخروج.
وأضاف خالد مرسي: إن شاء الله بعد صلاة الجمعة هيكون فيه إقبال أكتر، وإحنا عاملين حسابنا، ومجلس الإدارة أصر على هدم المدرج القديم، وده ساعدنا النهاردة، فيه أتوبيسات بتيجي من أماكن كتير زي التحرير وعمر مكرم، بتوصل الأعضاء للمقر وبترجعهم تاني، ومخصصين 4 جولف كار لكبار السن، وفيه أماكن معينة لدخولهم.
