هاني شاكر: شباب كتير قابلوني فرحانين بمنع المهرجانات.. واللي يهمني ربنا
قال الفنان هاني شاكر نقيب المهن الموسيقية، أنه هناك فئة كبيرة من الشباب يؤيدون قرار النقابة بمنع مطربين المهرجانات الشعبية ووقف المهرجانات، وذلك على الرغم من وجود فئة أخرى كبيرة ضد قرار النقابة.
وتابع هاني شاكر، خلال لقائه مع الإعلامية أسما إبراهيم، في برنامج حبر سري عبر شاشة قناة القاهرة والناس: ناس كتير وشباب كتير أوي قابلوني ولقيتهم مبسوطين بمنع المهرجانات، وفي ناس تانية بتحب المهرجانات حتى لو غلط ده ذوقهم.. أنا هقف بين إيدين ربنا مش هضحك عليه، وربنا عارف إن ده إبتذال وإسفاف وغير أخلاقي، اللي يهمني ربنا بس وأنا بعمل اللي يمليه عليا ضميري ومجلسي اللي أنا بعتز بيهم جدا.
وأشار هاني شاكر خلال الحلقة أنه لا ينبغي أن تكون المهرجانات الشعبية وجهة تعبر عن الفن المصري قائلا: تبقى كارثة لو تم اعتماد لون المهرجانات الشعبية كلغة سائدة في العالم، ويوم القيامة قرب.. مع احترامي للمهرجانات واللي بيحبوها ولكن مينفعش إن الصورة عن الفن المصري متاخدة من مطربي المهرجانات الشعبية.
وتابع نقيب المهن الموسيقية هاني شاكر: لو عندي السلطة، كان زماني مانع مطربين المهرجانات من الغناء في المملكة العربية السعودية، مش مصر بس.
