محمد صلاح: كيروش بيعاند الشعب المصري.. ومحدش فاهم هو بيعمل إيه
قال محمد صلاح نجم الزمالك السابق إن كارلوس كيروش المدير الفني للفراعنة يعاند الجماهير فقط، وذلك بعد الأداء السيء الذي ظهر به المنتخب الوطني في مباراته أمام نظيره نيجيريا في افتتاحية مبارياته ببطولة أمم إفريقيا 2021.
وأضاف صلاح خلال تصريحات تليفزيونية عبر برنامج حضرة المواطن: كارلوس كيروش بيعاند الشعب المصري ولو شايف الناس ماشية يمين بيروح هو شمال، ودايما بيتعامل مع الجماهير كده، هل من المعقول أن مفيش حد في مصر بيفهم وكيروش بس هو اللي فينا؟، والمدرب ده عامل زي النجار المسلح اللي بيرقع في البيت وكيروش هيفضل يعاند شعب مصر دايما ومفيش فايدة.
وتابع نجم الزمالك السابق: معقول مصر مفيش فيها غير صانع العاب واحد بس وهو عبد الله السعيد، المدرب مش عارف بيعمل أي ولازم يتحاسب، وكيروش قرر عدم وجود أفشة في المنتخب علشان الجماهير بتحب اللاعب ودايما بيعمل عكس الجماهير ومش بيمشي كلامه.
محمد صلاح: كيروش مش شايف غير عبد الله السعيد
وأكد نجم الزمالك السابق أن مصر بها العديد من لاعبي صناع اللعب ولكن كيروش لا يرى سوى عبد الله السعيد، مضيفًا: نفس الأمر كيروش قرر يحرق محمد شريف ونزلة في آخر دقيقة علشان يحرقه أمام الجماهير ومش فاهم المدرب ده بيعمل ليه كده.
واختتم محمد صلاح تصريحاته: كيروش ممهد أنه مش هيفوز ببطولة أمم إفريقيا وده اللي قاله قبل البطولة، ولو فاز بها هيقول أنا عملت إنجاز كبير ولو مدرب مصري كان يدرب الفراعنة اليوم كان رحل بعد المباراة مباشرة، لكن الأجنبي محمي غير المصري ولاعبي مصر مش بيلعبوا بروح وده غايب بشكل كبير والمدرب هو السبب ولازم يكون فيه حساب سريع.
