حلمي أقابل أحمد عز وعملت 25 عُمرة.. أبرز تصريحات هنيدي مع جمهوره على فيسبوك
يحرص الفنان محمد هنيدي على التواصل المستمر مع جمهوره عبر السوشيال ميديا، والتي كان أخرها عندما قرر فتح باب الأسئلة، ليجيب عليها بصدر رحب، وبمزيج من الكوميديا التي اعتاد عليها الجمهور.
إجابات هنيدي مع جمهوره على فيس بوك:
وجاءت إجابات هنيدي على أسئلة جمهوره مليئة بالضحك، فقال: مبلاقيش وقت للسوشيال ميديا لدرجة إني آخر مرة دخلت فيسبوك كان في نهاية شهر أيلول.
وتابع هنيدي في حديثه مع جمهوره ورد على أحد سؤال المتابعين، أكبر مبلغ دفعته في عزومة أو مطعم، قائلا: أنا وعلاء ولي الدين قبل مانتشهر، كنا بنروح المهرجانات ونضرب البدل وندخل البوفيهات بعد الافتتاح، ونضرب في البوفيه المفتوح، ففي مرة لقينا الفنانين كلهم في مطعم كده بعد الحفلة، دخلنا وقعدنا ومحدش يعرفنا خالص، وعمال الجرسون يحطلنا أكل ونطلب تاني ويقولنا تحبوا تجربوا كذا ونقول ماهو ببلاش، نجرب، وعلاء يقولي الراجل ده كريم أوي، خلصنا وجايين نقوم وبنخرج من المطعم، لقينا كل اللي شغالين في المطعم ورانا، كنا خلصنا تقريبا نص البوفيه.
وأجاب هنيدي على سؤال أحد متابعيه على العدد المرات التي أدى فيه العمرة، وقال إنه اعتمر 25 عمرة حتى الآن.
وتحدث هنيدي عن شعوره إذا رأى صديقه الراحل الفنان علاء ولي الدين، قائلًا: لو شوفت علاء ولي الدين دلوقتي هنسكت، مش هنتكلم في حاجة، في مرحلة في الصحوبية، خلاص انت مش محتاج تتكلم، دماغكم وروحكم بقت واحدة، عينك لوحدها هتقول كلام عمره ماي توصف ولا يتقال.
وسخر الفنان محمد هنيدي من طول الفنان أحمد عز، وقال: حلمي أقابل أحمد عز وأبصله لتحت مش لفوق.
وكشف الفنان محمد هنيدي كواليسه مع الثانوية العامة، وقال: فاكر بالضبط مجموعي في الثانوية العامة بس كان 53% تقريبا وجبتها على مرتين، مرة في الامتحان الأساسي والمرة التانية في الملحق، المشكلة اني كنت متأكد قبلها اني هجيب مجموع كبير وهدخل طب، ولما جبت الملحق، كنت بخبي الكتب وأنا رايح الدرس، لغاية لما واحد من الحارة قفشني، وقالي أنت رايح فين يا دكتور محمد؟، وعينه مليانه حزن، قلتله هو أنت غبي؟!، أنا دكتور يعني بحضر الدكتوراه، عيط من الفرحة وحضني.
