ميدو: ضد مجاملة جمهور الأهلي على حساب رمضان صبحي.. وكله معرض للنقد وكريستيانو رونالدو مثال
علق أحمد حسام ميدو، نجم نادي الزمالك السابق، على رحيل رمضان صبحي عن النادي الأهلي، وتوقيع غرامة مالية ضخمة على محمود عبد المنعم كهربا، وانتقاده الدائم لنجم وسط أرسنال الإنجليزي محمد النني.
ميدو: كل نجوم الزمالك بتتسابق لمساعدة عمرو زكي
وقال ميدو في تصريحات تليفزيوني: بشكر المستشار مرتضى منصور، لما كلمته وقولتله إن عمرو زكي محتاج مساعدة متأخرة، مشكلة عمرو إنه بيبقى قافل ومش عايز يقول لحد، بس لما فتح واتكلم كلنا كنا بنتسابق عشان نساعده.
وأضاف ميدو: اللي بيعمل حاجة بيعلمها لربنا وبيعملها من منطلق الواجب والأصول، والناس دايمًا هتعلق على الحدث من وجهة نظرها، اللي مبيحبكش هيقول إنك عملت كده عشان تاخد اللقطة، بس كل نجوم الزمالك عايزين يساعدوا عمرو.
ميدو: ضد مجاملة جمهور الأهلي على حساب رمضان صبحي
وأردف ميدو بـ: أتمنى إن رمضان صبحي يروح الزمالك، أنا ضد الناس اللي بتطلع في التليفزيون تجامل جمهور الأهلي على حساب ولد صغير ممكن يكون أخطأ، المغريات اللي كانت موجودة كانت ممكن تطمع أي حد.
وواصل أحمد حسام ميدو: مش هقول هو اتصرف صح ولا غلط، أنا معيشتش الموقف ده، هو الولد كان في موقف ضعف، وأنا مبحبش المزايدة مش أكتر، وفكرة إن جمهور النادي اللي اتربيت فيه يشتمك دي مش سهلة، وهو أكيد متأثر.
ميدو: كل اللاعيبة معرضة للنقد وكريستيانو رونالدو مثال
وأوضح ميدو: لما محمد النني لعب بشكل كويس كنت بطلع أقول ده، بس لما مستواه قلّ كان لازم أقول، أنا لما كنت بلعب كنت أوقات بتقطع في استوديوهات، وكل لاعيبة العالم بتتعرض للنقد، مثال على كده كريستيانو رونالدو، واللي بيحصله من جمهور مانشستر يونايتد.
وأردف ميدو بـ: كهربا كان لازم يمشي من الزمالك، خلاص هي كانت قفلت كده زي الدومنة، وطبيعي هيتأثر بالغرامة 2 مليون دولار، لأنه هيدفعها من جيبه، وفي الأول والأخر الزمالك سلك الطريق القانوني عشان ياخد حقه، ونجح في ده.
واختتم كهربا: المنافسة على الدوري الممتاز هتكون لآخر أسبوع بين الأهلي والزمالك، والأبيض ليه أفضلية في ظل انشغال الأهلي بخوض منافسات دوري أبطال إفريقيا.
