عمرو أديب عقب لقاء القمة: الأهلي مش عو ولا حاجة.. وممكن يترقص ويتعلب عليه ويتجاب فيه جول
علق الإعلامي عمرو أديب على التعادل الإيجابي، بين الأهلي والزمالك بهدفين لكل منهما في الأسبوع الـ20 من الدوري المصري.
مشوفتش في حياتي حد عنده حظ زي الأهلي
أديب قال خلال برنامج الحكاية مساء اليوم الأحد: مشوفتش في حياتي حد عنده حظ زي الأهلي.. الحظ كان مع الأهلي أمام الزمالك اليوم.. أوعى حد يكتب لي إن الأهلي في أعظم مستوياته.. الأهلي لم يكن جيدًا.
وأكمل الإعلامي عمرو أديب: الأهلي مش عو ولا حاجة وممكن يترقص ويتعلب عليه ويتجاب فيه جول.. بلاش الناس تكتب وتقول الأهلي عمل ولعب.. أنا مش شايف إنه عمل حاجة.. مدرب الزمالك منزل تغييرات جبارة ومن الموجودين.
وتابع: اللي لعبوا اليوم ولاد النادي، وعملوا ماتش كبير أمام الأهلي.. يا جماعة الأهلي عنده فرقتين والأهلي مش حلو ولا عظيم.
وأوضح: قفشة كان 50 في المية من قوة الأهلي اليوم.. ولو الزمالك عنده واحد زي قفشة كان الوضع اتغير.. وشيكابالًا كان نجم اليوم ولعب شوط تاني محترم.
وحافظ التعادل للزمالك على صدارة جدول الترتيب، برصيد 45 نقطة، فيما بقي الأهلي ثالثًا بنقاطه الـ41 لكن مع لعبه 3 مباريات أقل من منافسه، ويتواجد بيراميدز في المركز الثاني بـ43 نقطة.
