شوبير يفجر مفاجأة: كيروش لن يعود لمصر.. ومدرب الأهلي المحتمل طفش
كشف الإعلامي أحمد شوبير، حقيقة عودة البرتغالي، كارلوس كيروش مرة أخرى لتولي قيادة المنتخب الوطني، وخليفة الجنوب إفريقي بيتسو موسيماني في النادي الأهلي.
وقال أحمد شوبير في تصريحات إذاعية: ما زالت الأمور داخل اتحاد الكرة، ملخبطة في ملف المدرب الجديد للمنتخب، وأنا شايف أن مينفعش يطول أكتر من كده.. خلاص مفيش كيروش ومفيش كوبر، الاتنين مش هيكونوا موجودين مرة أخرى.
وأضاف شوبير: اتحاد الكرة كل شوية يقول مدرب أجنبي، لكن هما نفسهم مش عارفين يحددوا مين، وفاجنر اللي كل شوية يقولوا اسمه، مش هيدرب في مصر، الراجل كلامه واضح ومكمل في أوروبا، مش هييجي مصر لا الأهلي ولا المنتخب، خاصة أننا داخلين على مباريات صعبة في التصفيات، مالاوي وإثيوبيا في مصر، وبعدها غينيا ومالاوي هناك مباراتين هيكونوا في منتهى الصعوبة.
وأوضح نجم الأهلي السابق: لازم المنتخب يكسب مباراة خارج أرضه أو تتعادل في واحد منهم، أو تكسب واحد وتتعادل آخر، عشان كده بقول لازم نعلن التعاقد مبكرًا مع المدرب، ويكون معاه طاقة مساعد كويس يكون أمين.
مدرب الأهلي المحتمل طفش
وعن مستجدات ملف المدير الفني الجديد في الأهلي، أوضح شوبير: ما زالت المفاوضات مع المدير الفني الجديد للأهلي مُستمرة، وللعلم البرتغالي روي فيتوريا اللي الكل اتكلم عنه طفش، ولم يستكمل المفاوضات بسبب سقف الرواتب الذي يضعه الأحمر، ولن يتخطاه أيا كان اسم المدرب.
وشدد في نهاية حديثه: النادي الأهلي سوف سيعلن المدير الفني بعد 9 أيام من الآن، من أجل إنهاء حالة الجدل التي يشهدها الشارع الرياضي حاليًا.
