زكريا ندهي: مقولتش إني اترفضت في اختبارات ناشئين البنك الأهلي بسبب ديانتي
كشف زكريا ندهي الديب، لاعب نادي الزرقا حقيقة رفضه، في اختبارات الناشئين بنادي البنك الأهلي بسبب ديانته، حسبما تردد خلال الأيام الماضية.
زكريا ندهي: مقولتش إني اترفضت في اختبارات ناشئين البنك الأهلي بسبب ديانتي
ورد زكريا الشهير بـ بزيكا على سؤال هل الديانة كانت سببا في عدم قبوله في اختبارات البنك؟ في تصريحات خاصة لـ القاهرة 24: لحد دلوقتي أنا مستغرب، هو ليه أول ما شافني وشاف الورق بتاعي رفضني رغم إنهم قبلوني في التقسيمة؟، كنا 3 الولدين التانيين اتقبلوا وسجدوا في الأرض، رغم إن احنا الـ 3 اتقبلنا في التقسيمة، وأنا الوحيد أول ماشاف ورقي رفضني وهو ليه طالما هيرفضني قبلني خلال التقسيمة، أنا لم أقل بشكل مباشر إني اترفضت بسبب الديانة، لكن بعدما عرضت مشكلتي الناس هيا اللي استنتجت موضوع الديانة، وأعتقد من وجهة نظري إنها ملهاش سبب تاني غير ده، هل المشكلة في شكلي؟ وجهي فيه حاجة وحشة؟ هل اسم والدي هو العقبة؟.
وأضاف صاحب الـ 20 عامًا: والدي مريض بفيروس كبد، ويتم علاجه على نفقة الدولة، فهل هيكون ده السبب اللي اترفضت عشانه؟.
وواصل: هما ردوا من خلال الأخبار حسب ما قريت وقالوا أروح الاختبارات يوم الثلاثاء، لكن أنا مش هروح، أكيد هما عايزني أروح عشان أخلص الموضوع، لكن لم يتواصل أحد معي، ومستغرب ليه مفيش حد فيهم عايز يكلمني، أنا مش عيل صغير عشان يقولولي خليه ييجي بكرة من خلال أخبار، مفيش حد تواصل أصلًا معايا.
وأتم: أنا عايز أوصل صوتي، أنا محتاج يحكموا عليا في الملعب فقط، وياريت ميحكموش عليا من خلال شكلي ومنظري وبطاقتي، بناشد المستشار مرتضى منصور والكابتن محمود الخطيب من أجل مساعدتي.
