عضو مجلس إدارة الأهلي يطالب بتخفيض أسعار تذاكر المباريات

وجه محمد الدماطي عضو مجلس إدارة النادي الأهلي، رسالة يطالب فيها بتخفيض سعر تذاكر حضور مباريات مسابقة الدوري المصري الممتاز.

سواريش: بيراميدز استحق الفوز عن جدارة.. وإرهاق بعض اللاعبين وراء خسارة الأهلي

تعقد مهمة الأهلي.. بيراميدز يقدم هدية ثمينة لـ الزمالك في الدوري

ونشر الدماطي عبر حسابه على موقع التواصل الاجتماعي فيسبوك قائلًا: لأول مرة من خمس سنين هتكلم وأنا عضو مجلس لكن بلسان حالي لوحدي، عشان الأمانة تحتم عليا ده.

تصريحات عضو مجلس الأهلي

وأضاف الدماطي: عارف سيل النقد اللي هينزل عليا وتعليقات نقد على الجانب الفني اللي أنا واثق إن شاء الله إنه مع الوقت أكيد حيتصلح وثقتي كاملة في إدارة الكورة على تخطي الصعاب، لكن فكرة إني عيشت حياتي كلها في المدرج تخليني أقول الكلمتين دول.

وأوضح عضو مجلس الأهلي: لازم إعادة نظر سريعة في نظام دخول الجماهير، لا نظام الـfan Id ولا أسعار التذاكر بتدخل نوعية جمهور الأهلي بتاع زمان ولا فئات الشعب اللي بتحب الأهلي والكورة بجد، لازم سعر التذكرة ينزل لحد 25 جنيه عشان أي حد يوصل الملعب رايح جاي وياكل حاجة حيدفع زيهم مرتين يعني الماتش الواحد حيقف باقل حاجة 75 جنيه ودة يخلي الناس اللي مرتباتها 3 و4 آلاف جنيه في الشهر يقدر يروح على الأقل 3 ماتشات في الشهر.

وأكمل عضو مجلس إدارة النادي الأهلي: عكس دلوقتي اللي الماتش بيدخل في أقل حاجة 150 جنيه، نظام الحجز يرجع زي زمان من قدام النادي منافذ وشركات الاتصالات كلها مش الرعاة بس، والشراء بالبطاقة ورقم التليفون ويتعمل استعلام أمني لو في مشكلة التذكرة بتقف من على البوابة زي أوروبا، وتتفتح الملاعب بسعة كاملة، إحنا مصر ونعرف نأمن أي عدد وفي أي وقت مفيش دولة في المنطقة عندها ربع استقرارنا الأمني.

واستطرد: لو في حاجة حاسس إني مقصر فيها هي إني مش قادر أشوف المدرج مقصور على مجموعة معينة، اللي حصل في 2011 وربط الكورة بالسياسة كانت غلط مش حيتكرر تاني إن شاء الله، محدش أساسا يقدر يفكر يهز الاستقرار اللي احنا وصلنا له بعد معاناة رهيبة، ده لو حد حب بس يفكر يدخل سياسة تاني بقية الجمهور هي اللي حتسكتو مش الأمن حتى.

وواصل: عظمة النادي الأهلي هي مستمدة من شخصية جمهوره، وجمهوره هو جمهور المدرج، لو الشخصية دي مع الوقت تاهت حتبقى خطر كبير على رفعة النادي في المستقبل.

واختتم الدماطي: حتى التدريبات المهمة لازم  تتعمل بتذاكر بأسعار رمزية، من حق الدولة تعرف أي تجمعات كروية مين هوية الناس اللي موجودة سواء مباريات أو تدريبات، مفيش هزار في أي حاجة تخص الأمن، المهم تسهيل الإجراءات على الناس ده نمرة واحد ونمرة 2 يبقى التذاكر في مقدرة الجميع، ومن واحد عايش في المدرج من وأول ما وعيت على الدنيا وبغض النظر عن كل الأخطاء، جمهور الأهلي اللي بجد هو اللي بيصحح كل حاجة أول بأول.