حمدي بتشان: مستحيل أتعاون مع محمد رمضان.. وعمرنا ما طلعنا عريانين على المسرح زيه
كشف الفنان حمدي بتشان عن إمكانية تعاونه مع الفنان محمد رمضان في أغنية، مشيرًا إلى أنه لن يفكر في التعاون معه، كما علق على ظهوره عاري الصدر في الحفلات.
وقال حمدي بتشان لـ القاهرة 24: مستحيل أتعاون مع محمد رمضان في أغنية لأنه ممثل ومش مهنته الغناء، وكمان طريقتي مختلفة عنه وكل واحد بيحاول يحافظ على تاريخه واللي وصل له، وعمرنا ما طلعنا عريانين وصدرنا مكشوف على المسرح زي ما بيعمل ولكن في النهاية كل شخص حر في نفسه وأنا بتكلم على السلوك ومش بنتقد محمد رمضان كـ شخص بذاته.
وواصل بتشان: محمد رمضان مش ست عشان يطلع لابس مكشوف، ودا لأن بعض الفنانات دلوقتي بيلبسوا فساتين مكشوفة ودا شيء عمرنا ما شوفناه زمان ولا عمرنا شوفنا أم كلثوم أو نجاة الصغيرة لابسين عريان؛ لأننا اتربينا على كدا والأجيال العظيمة دول قدوتنا، وأهم حاجة أخلاق الفنان.
آخر أعمال حمدي بتشان
وعلى جانب آخر، تعاون حمدي بتشان مع الفنانة حورية فرغلي ومطرب الراب جيفارا بابلو في أغنية تحمل اسم الفرح من كلمات وألحان بابلو وتوزيع ميدو راشد، والتي نالت إعجاب الجمهور وحصدت العديد من المشاهدات، بجانب تقديمه للعديد من الأغاني الشعبية التي حققت نجاحا كبيرا، من بينهم الأغنية الشهيرة كلمني فهمني، إيه الأساتوك دا، أنا واد خلاصة وغيرها من الأغاني الشعبية.
