ميدو لـ سيد عبد الحفيظ: الزمالك كسبك كورة في الملعب لكن إنت خاسر سيئ
انتقد أحمد حسام ميدو، سيد عبد الحفيظ مدير الكرة بالنادي الأهلي، بسبب رفضه التواجد في الممر الشرفي الخاص بنهائي كأس مصر والذي انتهى بفوز الزمالك بهدفين مقابل هدف.
وقال ميدو في تصريحات تليفزيونية: محدش طلب منك يا كابتن سيد، إنك تتقبل الخسارة في فرق بين تقبلك الخسارة وبين إنك تكون خاسر سيئ، الزمالك كسبك كورة في الملعب، لكن اللي عملته برفضك الدخول في الممر الشرفي إنت كدة بتثبت إنك خاسر سيئ.
تصريحات أحمد حسام ميدو
وأضاف ميدو: لو منك يا كابتن سيد أدخل الممر وأسلم على لاعيبة الزمالك وأقول لكل واحد بسلم عليه مبروك بس هناخد الدوري منكوا لكن مرفضش الدخول.
وأردف أحمد حسام ميدو: أوجه التحية لسيد عبد الحفيظ على تصريحاته بشأن عدم تقبله للإهانة، وبقوله أنت كدة راجل دكر، أي حد لازم يرفض الإهانة.
وتابع ميدو: لكن كان نفسي إن سيد عبد الحفيظ، يحترم البروتوكول اللي أقره اتحاد الكرة المصري، واللي بيتمثل في الممر الشرفي وعلى فكرة البروتوكول ده مبعوت من اتحاد الكورة، مش مبعوت من نادي الزمالك، اتحاد الكرة بعت من قبل الماتش للأهلي والزمالك البروتوكول ده عشان نصدر صورة جميلة للكرة المصرية تُمثل الروح الرياضية للوطن العربي.
وواصل: فكرة إن الممر على المزاج زي ما قال سيد عبد الحفيظ مش داخلة دماغي وانت المفروض تكون فرحان بالفكرة حتى لو متعملتش قبل كده.
وتابع: الممر الشرفي يا كابتن سيد، نادي الزمالك بتاريخه هو اللي عاملهولك، احتراما للنادي الأهلي ولتاريخه، واحتراما للعلاقات القوية بين الناديين، لكن رفضك الدخول في ممر شرفي ده مينفعش يتعمل من مدير كورة يا كابتن سيد وهذا عتابي عليك.
واختتم حديثه قائلا: لو كان الأهلي كسب كان الزمالك هيدخل بكامل أعضائه في الممر الشرفي، أنا مع سيد عبد الحفيظ قلبا وقالبا في عدم تقبل الإهانة، ولكن عتابي عليه أنه لا علاقة للممر الشرفي بأزمتك ومشكلتك مع مرتضى منصور.
