بسمة وهبة عن عبد الرحمن أبو زهرة: أنا زعلانة من المخرجين والمنتجين اللي ناسين تراث مصر
دعت الإعلامية بسمة وهبة، المخرجين والمنتجين والفنانين، لاختيار الفنان عبد الرحمن أبو زهرة، للمشاركة في أعمالهم في موسم رمضان المقبل 2023.
وقالت بسمة وهبة، في برنامجها 90 دقيقة، المذاع عبر شاشة قناة المحور، عن عبد الرحمن أبو زهرة: أنا زعلانة أوي من الشباب المخرجين والمنتجين والمؤلفين اللي ناسين الذهب وتراث مصر، أتمنى إنه أي حد من الفنانين اللي عندهم دماغ وإنسانية يختاروا هذا الفنان العبقري، في رمضان المقبل، والفنان اللي معندوش إنسانية ميلزمش جمهوره، هؤلاء العمالقة أتمنى إننا نشوفهم وتجبوهم في أعمالكم في رمضان المقبل.
كما تحدثت عن لقائها مع الفنان عبد الرحمن أبو زهرة، قائلة: خرجت من الحوار ده بدروس كتير، إن اللطف من شيم الكبار، أوعى تفتكر إنك لما تعمل كده تبقى فظيع، اللطف تبقى إنسان كبير، الإنسانية عطاء، أنا روحت رحلة كان فيها سعادة من لما سمعت البداية لغاية ما وصلت للنهاية، وهو رافض النهاية ولسه متمسك وقال طالما ليا نفس فما زال العطاء مستمر.
وأضافت: شخصيته شخصية عنيدة متمسكة بالحياة، وطلباته كلها بسيطة، إن جيل الفن بكل أنواعه لا يقطع التواصل وعدم الاستغناء عن جيل العظماء، فهو جيل العطاء والخبر وتاريخ الفن المصري لأن هو ده تراث الفن اللي لسه موجود ولسه قلبه بينبض، مش عايز يحس إننا بنقوله خلاص كفاية عليك، ليه بنمسك في التراب ونسيب الذهب.
