هند صبري بعد نجاح فضل ونعمة: كنا ضيوف على الكوميديا.. ورامي إمام إيده خفيفة وقدمه سعد
أعربت الفنانة هند صبري، عن سعادتها بنجاح أجدد أفلامها الذي يحمل اسم فضل ونعمة، الذي جمعها بالفنان ماجد الكدواني.
وقالت هند صبري، في تصريحات تلفزيونية: مبسوطين من الإعجاب وإحنا سعداء بهذا النجاح، الفضل يعود أولا لـ رامي إمام لأنه اكتشف الكوميديا فيا من 12 سنة في مسلسل عايزة أتجوز، إحنا بنشتغل مع فريق عمل يبهيء لينا جو يخلينا نطلع كوميديا.
وأضافت هند صبري، متحدثة عن مخرج العمل رامي إمام: الفيلم عودة جميلة لأستاذ رامي إمام كان واحشنا، المخرج بيطلع مننا كوميديا وهي أصعب أنواع التمثيل، كلنا كنا مستمتعين، الفيلم ده محسناش بيه وخلصناه بمنتهى السلاسة، رامي إمام إيده خفيفه وقدمه سعد، وعودة حميدة لـ رامي إمام.
وأوضحت هند صبري، إن الجمهور متعطش للأفلام العائلية، قائلة: أعتقد إن الناس متعطشة للأفلام العائلية، وده فيلم عائلي زي الكتاب ما بيقول، مش بنحاول نقول إن فيه رسالة كبيرة، هو فيلم مُسلي وبيحترم كل الأعمار، قائم على المواقف مش على الإفيهات، إحنا ضيوف على الكوميديا.
واستكملت هند صبري حديثها: أعتقد إن أنا وماجد عندنا نفس المدرسة في التمثيل اللي هو السهل الممتنع لإننا مش بنبروز الإفيهات، وجميل إننا نشوف ممثلين بيلعبوا كوميديا وبعدين يرجعوا تاني مكانهم، ومبروك لـ ماجد الكدواني، اللي أنا من معجبينه ولما بييجي مشهد قدامي بتثبت، وكسبت أخ وصديق من الفيلم ده، سوي نفسيًا.
