ربيع ياسين: نلعب حسب الإمكانيات المتاحة.. ومبروك للنادي الأهلي الثلاث نقاط
علق ربيع ياسين، المدير الفني لفريق أسوان على الهزيمة من النادي الأهلي، بهدف دون رد، في مباراة ضمن منافسات الجولة الثانية من الدوري الممتاز.
تصريحات ربيع ياسين
وقال ربيع ياسين بالمؤتمر الصحفي عقب المباراة: مبروك للنادي الأهلي، أي مدرب بيحضر لمباراة الأهلي أكيد بيتعب جدا، والأهلي بيملك كل شيء في كرة القدم من الشباب والخبرات والكرة الهجومية والدفاعية.
وأضاف: مكانش فيه توفيق في مباراة الاتحاد ومن بعدها بدأنا نشتغل ونجهز وكان ممكن النهارده نسجل وكنا أفضل من المباراة اللي فاتت، وأنا فخور بلاعيبتي وعملنا ماتش كويس وكان نفسي نحقق نتيجة أفضل ولكن لعبنا قدام فريق كبير ولاعيبتي تعبت في الملعب وحاولت ولكن بتقابل فريق استثنائي.
وواصل: الأهلي والزمالك إمكانيات كبيرة وغير الباقيين، ومعايا مجلس إدارة محترم ولعيبة محترمة وجهاز محترم وبنعمل اللي علينا، كل وقتي لفريقي وبتعب جدا معاهم عشان نقدم حاجة كويسة وأتمنى الجاي يكون أفضل.
وتابع مدرب أسوان: المباراة الودية مع النادي الأهلي افادتني كتير جدا واشتغلنا كتير جدا قبل المباراة على كل شيء يخص النادي الأهلي من الجانب الفني والتكتيكي، وتابعنا مباراة الأهلي والإسماعيلي وتحدثت مع اللاعبين عن كافة التفاصيل قبل مباراة اليوم.
وأكمل: الحمدلله حاولنا ولكن خسرنا والحمدلله على كل شيء ومبروك للنادي الأهلي الثلاث نقاط، احنا فريق مش بندافع بس، بنلعب حسب الإمكانيات المتاحة لينا وبندافع وبنهاجم بحساب.
وأوضح: أنا لو ماسك الأهلي هلعب بشكل تاني غير شكل فريق أسوان لأن المدرب بيشتغل بالقدرات المتاحة له، في لعيبة لسه مجهزتش ومدخلتش فورمه ومنهم اتنين بدأوا النهارده وهما لسه راجعين من إصابة.
واختتم ربيع ياسين: إيفونا لعب النهارده بقوة وهو قيمة كبيرة حتى لو بربع قدراته الفنية وطلع عشان عمل مجهود كبير جدا، ومعايا لاعيبة كويسة جدا ومع الوقت والانسجام والمشاركة في مباريات اكتر هيكون لنا شكل تاني بإذن الله.
