أحمد زاهر: سر نجاح أدواري مع محمد سامي إن في كيميا بينا.. ونور الشريف زي أبويا
كشف الفنان أحمد زاهر سر نجاح أعماله مع المخرج محمد سامي وتفاصيل علاقته القوية بالفنان الراحل نور الشريف.
أحمد زاهر يكشف سر نجاحه مع محمد سامي
وقال الفنان أحمد زاهر في تصريحات تلفزيونية: سر نجاح أدواري مع محمد سامي إن في كيميا غريبة بيني وبينه لأن محمد أخويا وصديق عمري لدرجة إن في الشغل ممكن يبصلي بصة أقوله أوك فهمت ما تقولش وحتى الناس ممكن يشوفونا يقولوا دول مجانين دول فهموا بعض إزاي وأنا أكتر جوايزي اللي أخدتها كانت عن أعمالي اللي عملتها مع محمد سامي.
علاقة أحمد زاهر بالفنان نور الشريف
وأضاف الفنان أحمد زاهر: نور الشريف هو كل حاجة في حياتي وزي أبويا وهو اللي أكتشفني وهو جه المعهد عندنا وأنا في سنة أولى ومن وسط كل الطلبة الموجودين قال أنا عايز الولد ده وماكنتش مصدق نفسي إني واقف قدام الأستاذ نور الشريف ولقيتهم بعد سنة كاملة في وقتها كنت توقعت إنه نسيني بيبعتولي على مسلسل الرجل الأخر وهي كانت بداية انطلاق نجوميتي بسبب نور الشريف وأنا اتعلمت منه كل حاجة الإجتهاد والإبداع وإزاي بمشهد واحد الواحد يأثر بيه.
أحمد زاهر يتحدث عن دخول بناته الوسط الفني
ومن ناحية أخرى تحدث الفنان أحمد زاهر عن دخول بناته الوسط الفني:عمري ما فرضت بناتي على الوسط الفني وتامر حسني هو اللي اكتشفهم ومربيهم على إيده وهو اللي قالي دول موهبين.
آخر أعمال أحمد زاهر
يذكر أن من آخر أعمال الفنان أحمد زاهر مسلسل سوشيال والذي عرض في شهر فبراير الماضي 2022 وتدور أحداث المسلسل فى إطار اجتماعى حول مخاطر السوشيال ميديا وعمليات التجسس والنصب الإلكتروني، تأليف محمد جلال وإخراج رؤوف عبدالعزيز وشارك في العمل بجانب الفنان أحمد زاهر العديد من الفنانين منهم ميرنا نور الدين ومغني الراب شاهين وتامر فرج وغيرهم.
