صاحب محل بلايستيشن يمنح الأطفال ساعات لعب مجانية: فكرت في التجارة مع ربنا
تداول رواد مواقع التواصل الاجتماعي منذ أيام، مبادرة مميزة من جانب مالك كافيه وبلاي ستيشن بـ منطقة الحوامدية بالجيزة، وتهدف المبادرة إلى تشجيع الأطفال والشباب على أداء الصلاة في أوقاتها، مقابل منحهم ساعات مجانية للعب البلاي ستيشن.
إسلام: فكرت في فتح مشروع ويكون ربنا شريك في الرزق اللي يجيلي
وتحدث إسلام مالك الكافيه والبلاي ستيشن، لـ القاهرة 24، عن فكرة مبادرته وهدفها قائلًا: فكرة الكافيه وبلاي ستيشن جاتلي بسبب رغبتي في فتح مشروع صغير كافيه أو مطعم، وفكرت في عمل فكرة مختلفة لمشروعي يكون فيه تجارة مع ربنا، لذلك خصصت نسبة من مكسبي من الكافيه لله، وذلك بسبب رغبتي إن ربنا يكون شريك معايا في الرزق اللي بيجيلي.
وأضاف إسلام: لاحظت عند افتتاحي للكافيه والبلاي ستيشن، أن الأطفال والشباب الصغير بعضهم بيشتموا بألفاظ سيئة، لذلك فكرت في عمل حاجة تخليهم يتكسفوا أنهم يشتموا، وتبقى الصلاة بنسبة ليهم حاجة عادية، لذلك ابتكرت الفكرة دي لتحفيز الأطفال على أداء الصلاة في أوقاتها، وحتى أساهم في جعل الصلاة عادة بالنسبة لهم، وأنا بقدم الهدية دي للأطفال مقابل الصلاة، لتحفيزهم على القرب من الله -عزو وجل- من صغرهم.
إسلام: فكرت في توعية الجيل الصغير بأهمية الصلاة
وتابع: وبعد أيام من تطبيق الفكرة وجدت آراء إيجابية، وأنا شايف إن الفكرة مفيدة جدًا للشباب والجيل الصغير للمساهمة في توعيتهم وتربيتهم بشكل صحيح، وبسبب إن بعضهم ميعرفوش حاجة عن الدين والصلاة، ومفيش قدوة أفضل من الدين.
واختتم: أتمنى إن الناس تخصص جزء من أموالها وتجارتها لله، وتكون تلك الأموال مخصصة للفقراء والأيتام والمشردين وكل محتاج.
