أحمد خالد صالح: آخر مشهد في فيلم 19 ب صعب وممتع.. وكان فيه تحدٍ
أعرب الفنان أحمد خالد صالح، عن سعادته بالمشاركة في فيلم 19 ب، مع المخرج أحمد عبد الله والفنان سيد رجب، ونافسوا به في مهرجان القاهرة السينمائي الدولي في دورته الـ 44.
وقال أحمد خالد صالح، خلال ندوة الفيلم المقامة حاليا في دار الأوبرا: أول ما اتعرض عليا الفيلم؛ تحمست لكون أحمد عبد الله بيكلمني وبحب شغله، وشفت الورق فيه قضايا كثير منها ثقافة الاختلاف، والشغل مع أستاذ سيد رجب.
وأضاف أحمد خالد صالح: المشهد بتاع الدكة وجزء إنساني من نصر، والشخصية ملهاش بُعد واحد ومش مجرد واحد بياخد الحياة بدراعه، ولكن الحياة اللي خليته كده.. اتبسطت بوجود مشهد بيوضح بُعد مُختلف للشخصية.
وتابع: المشهد الأخير اللي بموت فيه، كان مشهد صعب ولكن مُمتع جدا، وعارفين بنعمل إيه، وتكاتفنا في التصوير سهّل الموضوع، وكان فيه تحدٍ كبير جدا وعملنا بروفة قبلها بيوم، وعارفين هنعمل إيه، وده سهّل الموضوع شوية.. هل دي النهاية العادلة للجمهور ولا لأ؟.. هسيب الجمهور هو اللي يرد.
فيلم 19 ب
يشار إلى أن فيلم 19 ب؛ تدور أحداثه حول حارس عقار يعيش حياة روتينية في فيلا قديمة، منذ ستينات القرن الماضي، لتصبح الفيلا عالمه الخاص، ولكن يكسر استقراره شابًا يريد اقتحام مساحته الخاصة، ليجد حارس العقار المُسن نفسه في مواجهة لم يتوقعها؛ يعيد فيها اكتشاف ذاته من جديد، وهو من بطولة سيد رجب، أحمد خالد صالح، وإخراج أحمد عبد الله السيد.
