عادل إمام بيخاف حد يظهر جنبه وقالي اشتغل بعيد عني.. أبرز تصريحات رضا حامد
حل الفنان رضا حامد، ضيفًا على الإعلامية راغدة شلهوب، وتحدث خلال الحلقة عن معاناته في إيجاد الأدوار، وتجاهل المخرجين والمنتجين له، كما تطرق للتعليق على تصريحاته السابقة عن الفنان عادل إمام، مؤكدًا تقديره له بخلاف المواقف التي جمعتهما.
أبرز تصريحات رضا حامد
ونعرض في السطور التالية، أبرز تصريحات رضا حامد التي جاءت على النحو التالي:
-بتصل على التليفونات كلها لكن محدش بيرد، ومرة روحت شركة فنية فوجدت إهمال في الاستقبال فبطلت أروح.
-تواصلت مع أقرب أصدقائي المخرج محمد النقلي، والمخرج أحمد صقر، لكن مخدونيش معاهم في أدوار.
-أعلى أجر حصلت عليه من أعمالي كان 120 ألف جنيه.
-أنا مش ندمان على تصريحاتي عن عادل إمام، وأنا بقدره ومقولتش عليه غير إنه رمز من رموز الفن الشامخ ورجل رحلته عظيمة.
-لما طلبت من عادل إمام اشترك معاه في عمل، قالي اشتغل بعيد عني.
-اشتغلت مع الفنان سمير غانم، وكان بيخليني أعمل اللي أنا عايزه ويزودني لكن أستاذ عادل إمام فيه حاجات محددة متفقين عليها، ومكنش بيديني الفرصة إني ارتجل ولا أخد فرصتي.
-هل من العدل إن بطل العمل ياخد 10 مليون، ورضا حامد في دور مهم جدًا ياخد 100 ألف بس؟
-آخر مرة كنت بشتغل في مسلسل مع حسن الرداد، واتدخل عشان أخد أجر 100 ألف جنيه، ومن بعدها مش عارف يتدخلي تاني عشان هو بيتعامل مع الشركة دي كتير.
-عادل إمام فعلًا مش بيحب حد يظهر جنبه، وبيخاف من ده، وعنده إحساس إنه بكدة بيحافظ على نجوميته.
