رمضان 2023.. لوسي بعد اعتذارها عن مسلسل توحة: مكنش فيه نظام من صناع العمل
![الفنانة لوسي](/UploadCache/libfiles/39/3/600x338o/836.png)
كشفت الفنانة لوسي تفاصيل اعتذارها عن مسلسل توحة المقرر عرضه في الماراثون الرمضاني 2023، مشيرة إلى أن صناع العمل لا يوجد لديهم أي نظام.
تحدثت الفنانة لوسي في تصريحات لـ القاهرة 24 عن سبب اعتذارها عن مسلسل توحة المقرر طرحه في رمضان 2023، إذ قالت: اعتذرت عشان أنا بحب النظام، بحب أكون عارفة راسي من رجلي ماحبش حد يقولي بكرة نبعت الورق لا بعده أصل معرفش حصل إيه والكلام ده، وأنا مابحبش الحكايات دي عشان كدا أنا نجحت، لأني بعرف أفرّق بين أن الشغل شغل والأكل بتاعي أكل والخروج خروج والجد جد.
وأضافت لوسي: إلى حدً ما مكنش في نظام من صناع عمل توحة عشان كدا أنا اعتذرت عن العمل، وأنا بحب نقطة نظام في العمل، أنا فضلت مستحملة اللي هما بيعملوا ده كتير جدًا وأنا في الآخر عندي طاقة وعندي ورق تاني متأجل مش عارفة آخد فيه قرار بسبب مسلسل توحة، كنت عايزة أعرف هخش معاهم ولا لا.
![](/Upload/libfiles/93/5/307.jpg)
وأردفت لوسي: اعتذرت مرتين عن مسلسل توحة، وماتقبلوش الاعتذار ده، ثم اعتذرت مرة تالتة وقفلت الحكاية خالص، وأنا قولتلهم استخرت ربنا وربنا قالي العمل ده مش حلو.
واختتمت لوسي حديثها: أنا بحيّي الأستاذ محمد النقلي المخرج الكبير، ورق توحة حلو أوي والشغل مع الأستاذ محمد النقلي فيه متعة شديدة جدًا، وورق الأستاذ أحمد صبحي المؤلف الموهوب اشتغلت معاه قبل كدا في البيت الكبير، بس أنا كان لازم أعتذر عشان أنا فضلت مستحملة اللي هما بيعملوه ده كتير جدًا فـ كان لازم أعتذر.
وفي سياق متصل، أكدت لوسي لـ القاهرة 24، أنها في طريق الاعتذار عن مسلسل آخر بسبب عدم النظام أيضًا، ولكنها لا تريد الإفصاح عنه حاليًا، وسبب الاعتذار نفس سبب الاعتذار عن مسلسل توحة.
مسلسل توحة
العمل من بطولة الفنانة علا غانم، دينا فؤاد، إيهاب فهمي، حجاج عبد العظيم، انتصار، وهو من تأليف أحمد صبحي وإخراج محمد النقلي، والعمل من المقرر طرحه في الموسم الرمضاني 2023، وتدور أحداثه في إطار الحي الشعبي وحول مفهوم قوة الإرادة وتحقيق الأهداف الدراسية أو العاطيفية أو العملية.