غادة عادل: كنت مترددة أعمل فيلم البطة الصفرا.. وشخصيتي معملتهاش قبل كده في مشواري
تحدثت الفنانة غادة عادل، عن كواليس أجدد أفلامها الذي يحمل اسم البطة الصفرا، موضحة أنها كانت تخوفت من قبول الدور خاصة وأنه قليل ما تنجح النساء في الأدوار الكوميدية على حد قولها.
وقالت غادة عادل، خلال لقائها مع برنامج The Insider بالعربي: في الأول كنت مترددة، ورامي السكري ومحمد حفظي منتجي الفليم قالا لي طيب ممكن تقرأي؟
قولتلهم أنا مش عايزة أعمل كوميدي الفترة دي، فقالا لي طيب ممكن تقرأي بس علشان عايزين رأيك، ولما قرأت من ربع الفيلم قولت لهما أنا شكلي هعمل الفيلم ده لأن الشخصية عجباني، والفيلم عاجبني.
وتابعت: ساعات بيبقى دور البنت في الأفلام الكوميدي مش بيبقى حلو، ودي كانت أكتر حاجة بتضايقني شوية في الأفلام الكوميدي أن بيبقى دور البنت علشان لازم يبقى فيه واحدة تعمل أي حاجة مش مهمة، ولكن لما قرأت الفيلم ده هو فيه فيلم حلو وتقيل والكوميديا السوداء وفيه موضوع وفيه شخصيات حلوة.
وكشفت غادة عادل عن تفاصيل دورها في فيلم البطة الصفرا، قائلة: أنا بعمل بصراحة شخصية جديدة جدًا عليا ومختلفة وخوفتني، والشخصية نفسها فيها حاجات كتير أنا معملتهاش في مشواري الفني قبل كده، وده حمسني إن فيلم كوميدي في دور البنت كبير ومهم.
فيلم البطة الصفرا
فيلم البطة الصفرا، من بطولة الفنانة غادة عادل، ومحمد عبد الرحمن توتا، محمود حافظ وفرح الزاهد، وإبرام سمير وحسن أبو الروس وأحمد طلعت، والفيلم قصة وسيناريو وحوار محمود عزت ومن إنتاج المنتج رامي السكري، ويشارك في إنتاجه السيناريست والمنتج والرئيس السابق لمهرجان القاهرة السينمائي الدولي محمد حفظي بالإضافة إلى المنتجين كريم السكري وحامد مصطفى.
