محمد رمضان: نفسي أجسد شخصية رفاعة الطهطاوي عشان أنهض ببلدي
كشف الفنان محمد رمضان عن أمنيته في تجسيد السيرة الذاتية للراحل رفاعة الطهطاوي.
محمد رمضان يتحدث عن تجسيد سيرة رفاعة الطهطاوي
وأكد الفنان محمد رمضان خلال ندوة تكريمه بمهرجان الأقصر للسينما الأفريقية في دورته الـ12، أنه يتمنى تجسيد السيرة الذاتية لـ رفاعة الطهطاوي، مشيرًا إلى أن الأخير استطاع تطوير بلده بعد الخبرة التي اكتسبها من الخارج، موضحًا: الشخصية بنقول بيها إن مش لازم أكون شخص أتعلم في لندن أو أتعلم في أمريكا عشان أقدر أطّور بلدي وأنهض بيها.
كما تحدث محمد رمضان على بعثة رفاعة الطهطاوي إلى الخارج، قائلًا: رفاعة الطهطاوي طلع في بعثة وشاف ولكن رجع لبلده وقدر يعمل مزيج ما بين التطوير والتحديث.
وأضاف محمد رمضان: والأصل أني أبقى أتطور من خلال بلدي، واكتسب الخبرات من بره وبعدين أرجع أنهض ببلدي ودا طموحي طول عمري.
محمد رمضان يتحدث عن وصوله إلى العالمية
وسرد الفنان محمد رمضان موقف له مع الفنان الراحل عمر الشريف عن الوصول إلى العالمية، إذ قال رمضان، إن عمر الشريف سأله عن طموحه قائلًا: وعمر ما هنسى سؤال عمر الشريف الله يرحمه قالي ايه طموحك، كان فيه طبق فاضي وحطيت الملاحتين جوه الطبق وقولت لـ عمر الشريف إن الطبق ده العالم والملاحة دي أمريكا والملاحة دي مصر.
وأردف محمد رمضان: قولتله أنا أتولدت في مصر فـ بالتالي أنا مصر واللي أتولد في أمريكا اسمه أمريكاني ومصر جوه العالم وأنا أتولدت جوه العالم يعني أنا عالمي، قالي مش فاهم، قولتله ليه العالمية أتخذت من العالم كله وبقت في أمريكا بس، يعني ليه عشان أبقى عالمي لازم أبقى عايش في أمريكا، ليه مبقاش عالمي وأنا عايش في مصر.
