جالي عروض كتير بعد موضوع عائلي 2 واستفدت من شغلي مع محمد صبحي.. أبرز تصريحات محمد رضوان
حلّ الفنان محمد رضوان ضيفًا على الإعلامي عمرو الليثي ببرنامج واحد من الناس، وتحدث خلال الحلقة عن مشاركته في مسلسل موضوع عائلي 2، وكواليس دور رمضان حريقة الذي جسده خلال أحداث العمل، كما تحدث عن بداياته في الفن.
أبرز تصريحات محمد رضوان
ونستعرض في السطور التالية، أبرز تصريحات محمد رضوان التليفزيونية:
-التمثيل هوايتي الأولى وأنا خريج المعهد العالي للسينما وعضو المسرح القومي.
-الناس حبت شخصية رمضان حريقة حب رباني.. وكنت شايف في عيونهم محبة صادقة.
-بدأت مسرح في أولى جامعة.. وكنت بقول جملة أو اتنين بس، وفي سنة رابعة كنت رئيس المسرح.
-استفدت من شغلي مع محمد صبحي جدًا، لأنه كان الجامعة الأولى ليا في المسرح.
-أشرف زكي اقنعني إني أقدم في المعهد بعد ما أتخرج وقالي من 5 سنين إني هبقى نجم مصر.
-أنا بمثل من زمان مسرح وسينما ودراما بس تحديدًا بعد مسلسل هذا المساء الناس بقت تاخد بالها مني ويسألوا مين ده.
-موضوع عائلي يعتبر النقطة الفارقة في حياتي، والمخرجين كلهم بقوا بيقولوا عايزين رمضان حريقة معانا.
-سيد مرسيديس في مسلسل رانيا وسكينة الشخصية الشريرة المفضلة ليا.
-كنت مع محمد هنيدي في الجامعة، واشتغلنا مع بعض كتير بس كانت أدواري صغيرة معاه.
-أولادي التلاتة عايزين يسلكوا نفس مسلك الفن وياسين بيدرس مسرح، ومؤمن ظهر في مشهد في مسلسل موضوع عائلي 2، وريم بتدرس تربية نوعية قسم مسرح.
-كان في ممثل تاني متعاقد على شخصية رمضان حريقة، لكن اختلف مع فريق العمل على الأجر.
-أحمد الجندي المخرج رشحني لدور رمضان حريقة، وماجد الكدواني رحب جدًا عشان إحنا دفعة واحدة.
-كان بيحصل ارتجال كتير في مسلسل موضوع عائلي بالاتفاق مع أحمد الجندي.
-مشهد السفرة في موضوع عائلي عدناه 13 مرة، وكل ما أزعق لـ طه دسوقي الناس تضحك والمشهد يبوظ.
-جالي بعد الجزء التاني من مسلسل موضوع عائلي عروض كتير جدًا، ورفضت أدوار كتير لأن خلاص حصلي استقرار فني.
-بهدي نجاحي دايمًا لروح أبويا وأمي، لأنهم كانوا هيتبسطوا بالنجاح ده جدًا.
