ميدو: كنت هعيط بسبب انهيار مشجع الزمالك.. واللاعيبة الكبار بتظهر في الأوقات الصعبة
قال أحمد حسام ميدو، مدرب الإسماعيلي الحالي، إن أحد لاعبي نادي الزمالك السابقين كان نادما بعد رحيله عن الفريق في وقت سابق، مشددا على أهمية الشعور بنعمة التواجد في صفوف الزمالك.
ميدو: كنت هعيط بسبب انهيار مشجع الزمالك
وقال ميدو في تصريحات تلفزيونية: أحد لاعبي الزمالك رحل عن الفريق وكان ده برغبته، وحذرته قبلها وقولتله هتندم، واللاعب ده بعد ما مشي من الزمالك كلمني وقالي أنت كنت على حق، وكان ندمان على رحيله عن الزمالك بالفعل.
وواصل: جمهور الزمالك لو شاف اللاعيبة بتعمل اللي عليها حتى لو هتخسر الناس هتوجه ليكوا التحية، وبشجع الزمالك من وأنا صغير، عمري ما شوفت المنظر اللي شوفته في ماتش شباب بلوزداد، الزمالك لما كان بيدخل فيه جون كأن القيامة بتقوم.
وواصل ميدو: اللاعيبة الكبار في الزمالك لازم تظهر في الأوقات الصعبة، واللاعيبة لازم تتحمل مسؤوليتها، وأول لما اللاعيبة بتلعب كويس احنا أول ناس بنشيد بيها، والجمهور بيطلعهم السما.
واختتم: فيديو انهيار واحد من جمهور الزمالك في المقصورة في مباراة شباب بلوزداد كنت هعيط بسببه، ومن حق جماهير الزمالك إنها تشوف لاعيبتهم بيقاتلوا، لازم لاعيبة الزمالك تلعب للنادي ولاسمها، اللاعب محظوظ لأنه بيعمل حاجة بيحبها.
وخسر الزمالك أمام شباب بلوزداد الجزائري، بهدف نظيف، في أولى مباريات دور المجموعات لبطولة دوري أبطال إفريقيا.
