بسمة داود: لم أتأثر نفسيًا بشخصية ريهام في مسلسل إيجار قديم ولم أقابل شخصية مثلها بحياتي
تحدثت الفنانة بسمة داوود، عن شخصية ريهام التي قدمتها في مسلسل إيجار قديم بطولة الفنان شريف منير، والذي عُرض خلال الفترة الماضية محققًا نجاح كبير لدى الجمهور.
وقالت بسمة داوود، عن شخصيتها في مسلسل إيجار قديم، في تصريحات خاصة لـ القاهرة 24: نفسي حد يقولي أنه حب شخصيتي في مسلسل إيجار قديم، وشخصية ريهام مكنتش توكسيك ولكن طريقة حبها مختلفة وكانت بتحب نفسها أكتر والأولوية للحاجات اللي بتحبها مش اللي شريك حياتها بيحبها، وهي مكنتش بتشوف أنها بتعمل حاجة غلط ده كان حب من وجهة نظرها، وبيبقى عندها مبرراتها سواء هي كانت غلط أو صح.
وأضافت: ياريت كنت قابلت حد في حياتي بنفس شخصية ريهام كان هيبقى الموضوع أسهل عليا، عمري ما قابلت حد بشخصية ريهام وبدأت أفكر في تفاصيل الشخصية وقعدت كتير مع عمرو الدالي مؤلف المسلسل ونتخانق مع بعض كتير نتج عنها تفاصيل الشخصية، وبدأت أفكر في تصرفات الشخصية وإحساسها، والتفاصيل الكتير دي بتخلي الشخصية تبقى بني آدم.
وأكدت بسمة داوود، أنها لم تتأثر نفسيًا بـ شخصيتها في مسلسل إيجار قديم، موضحة: الحمد لله متأثرتش نفسيًا بشخصية ريهام في مسلسل إيجار قديم، ولكن الناس دلوقتي لما بتكلم في حاجة جد بقوا يقولوا دي ريهام اللي بتتكلم، وبالنسبة للتعليقات على الشخصية حتى لو كانت سلبية فهي بالنسبة ليا مفيدة، يعني حد يتفرج ويتعب نفسه ويكتب كومنت ده معناه إني عملت دور ناجح والجمهور صدقه.
أبطال مسلسل إيجار قديم
وشارك في بطولة مسلسل إيجار قديم عدد من النجوم أبرزهم، شريف منير، صلاح عبد الله، فيدرا، محمد الشرنوبي، ميمي جمال، وهو من تأليف عمرو الدالي، وإخراج طارق رفعت.
