بسمة داوود: فيفي عبده ست بـ 100 راجل.. وتجربتي بمسلسل شغل في العالي خطوة جيدة
أعربت الفنانة بسمة داوود عن حبها الشديد للفنانة فيفي عبده، والتي تعاونت معها في مسلسل شغل في العالي والذي عُرض في الموسم الرمضاني 2022.
وقالت بسمة داوود، في تصريحات خاصة لـ القاهرة 24: فيفي عبده دي قمر، وليها مواقف جدعنة كتير أوي وكنت بشوف بعيني هي بتعمل إيه مع الناس، وهي شخصية بـ 100 راجل ودمها خفيف بشكل مش طبيعي وأنا بموت فيها، ولما بشوف فيديوهاتها على السوشيال ميديا بلاقيها هي هي، وهي مش من الناس اللي في التمثيل حاجة وبرا التمثيل حاجة تانية، بجد إنسانة طبيعية.
أما عن تجربتها في مسلسل شغل في العالي، فقالت بسمة داوود: شيرين رضا وفيفي عبده لطاف جدًا وحدوتة مسلسل شغل في العالي كانت حلوة، والحمد لله دوري كان بعد ما عملت ملوك الجدعنة وتاج راسنا بابا في مسلسل نصيبي وقسمتك، كان بالنسبة ليا خطوة كويسة في مستقبلي المهني، وإني همثل مع ناس مهمة أوي كده وكمان في عمل كوميدي، كنت لسة بجرب نفسي هل هنفع في الكوميدي ولا هقدم دراما بس؟ وهل الناس هتستقبلني ولا لأ؟ والمسلسل كنا بنهزر فيه وعلاقتنا ببعض كانت لطيفة.
أبطال مسلسل شغل في العالي
وضم مسلسل شغل في العالي العديد من الفنانين مع فيفي عبده وشيرين رضا، منهم: فريد النقراشي، ساندي مراد، تامر حبيب، رشا بن معاوية، مروان يونس، توني ماهر، محمد مزبان، كريم سرور، بسمة داود، بيومي فؤاد، صبري عبد المنعم، أحمد جمال سعيد، نضال الشافعي، فراس سعيد، سليمان عيد، والمسلسل من تأليف حسين مصطفى محرم وتحت قيادة المخرج مرقس عادل.
