بعد واقعة تسميم القطط بنادي الجزيرة.. ناشطة في حقوق الحيوان تكشف تفاصيل الواقعة
تداول مستخدمو مواقع التواصل الاجتماعي مستندًا يثبت تسمم القطط المجاورة لنادي الجزيرة بالقاهرة، وتواصل القاهرة 24 مع دينا ذو الفقار، لمعرفة كافة التفاصيل عن واقعة تسميم القطط في نادي الجزيرة.
تسميم القطط في نادي الجزيرة
وتحدثت دينا ذو الفقار الناشطة في حقوق الحيوان، في تصريحات خاصة لـ القاهرة 24، عن واقعة تسميم القطط بنادي الجزيرة قائلة: بالفعل عرفنا إن فيه قطط ماتت مسمومة في نادي الجزيرة، لكن لسه مش عارفين إيه نوع السم ده، ومين الجهة اللي وراء عملية التسميم.
وأضافت دينا ذو الفقار: إدارة نادي الجزيرة معندهاش علم عن واقعة تسميم القطط، وهي عملت بلاغ لنقطة الجزيرة للتحقيق في الواقعة أول أمس، وفي الوقت الحالي لم تتم معرفة من وراء عملية تسميم القطط، ومن المتوقع أن يكون العمال اللي عملوا كده بعد ما حد دفعلهم فلوس، مؤكدة أن التحقيق في الواقعة ما زال جاريًا.
تعليقات رواد مواقع التواصل الاجتماعي على تسميم نادي الجزيرة للقطط الضالة
وانتقد أحد رواد مواقع التواصل الاجتماعي أسلوب تعامل نادي الجزيرة مع القطط الضالة، قائلًا: نادي الجزيرة سمم القطط اللي في النادي كلها، علمًا بإن دي مش أول مرة يعملوها، نادي الجزيرة قتل القطط بالسم قبل كده في 2014، وفَضَّلت عدم نشر صور القطط وهي ميتة لإنها مؤذية جدًا.
بينما قال حساب باسم سامح: اللي انتوا شايفينه ده من نادي الجزيرة، أنا متأسف على بشاعة المنظر بس من ساعة ما شوفت الصور وأنا دمي بيغلي، أنا حقيقي معرفش ده بسبب ضغط من أعضاء مرضى نفسيين ولا من إدارة معندهاش ذرة رحمة، والموت بالسم من أكتر الموتات ألما على الحيوانات وبيشوفوا عذاب حقيقي لحد ما تطلع روحهم، يعني مش حتى موت رحيم بأي شكل، القطط دي ماتت متعذبة.
وقال حساب باسم: اللي حط السم ليهم ربنا ينتقم منه في أعز من يملك، ده ست دخلت النار عشان عذبت قطة بجد منكم لله، أول مرة أبقى مش عارف أعبر، وأقول إيه بس حسبي الله ونعم الوكيل.
بينما انتقد حساب آخر أسلوب نادي الجزيرة في التعامل مع القطط الضالة قائلًا: نادي الجزيرة أول نادي في مصر يخصص مقبرة للقطط والكلاب، احترامًا للإنسانية قبل الحيوانات، قامت إدارته بقتل أكتر من 30 قطة بالسم، ودي مش أول مرة.
