جويل مردينيان: مينفعش أطفالنا يعرفوا الجنس من الإنترنت.. وبكيت فرحًا بسبب مساعدتي لـ الأمهات في برنامجي
كشفت الإعلامية وخبيرة التجميل جويل مردينيان تفاصيل لجوئها إلى طبيبة نفسية بسبب ابنتها، بجانب الحديث عن نجاح الموسم الثاني من برنامجها جويل بلا فلتر.
وقالت جويل مردينيان لـ القاهرة 24: نجاح الموسم الأول من برنامجي خلاني أجرأ وأفتح مواضيع حساسة ومنها موضوع العلاقة الجنسية بين المرأة والرجل، وشجعت الأمهات يحكوا لـ أولادهم عنها، عشان يكتشفوها من الأهل ومش من الإنترنت وأماكن غلط، وأنا جريئة بس دا موضوع حساس وكنت محرجة أتكلم فيه مع بنتي ولجأت لـ طبيبة نفسية سعودية عشان أعرف أزاي أتكلم معاها واكتشفت أن فيه كتب بتتكلم عن إزاي الأهل يوصلوا معلومات صح لـ أولادهم عن العلاقة الحميمية.
وواصلت جويل: كنت خايفة من الجمهور العربي ميتقبلش الموضوع لأنه عيب عندنا، ولكن الحمد لله تاني يوم من عرض البرنامج كنت بعيط من السعادة بسبب تعليقات الجمهور، وتلقيت رسائل من أمهات بيشكروني ومنهم أم قالتلي شكرًا أنك طرحتي الموضوع لأن عندي بنت 13 سنة ومش عارفة أتكلم معاها إزاي، وواحدة بعتتلي أنها مطلقة ومكسوفة تتكلم مع ابنها، وسعيدة إن برنامجي بيضحك ومسلي وفي نفس الوقت ملهم.
جويل مردينيان: شجعت المشاهير يتبنوا أطفال زلزال سوريا
وسبق وتحدثت جويل مردينيان عن أهمية التبني، وقالت في تصريح سابق لـ القاهرة 24: التبني أجمل هدية من الله ولما أخدت ابني من دار الأيتام كانت أحلى لحظة في حياتي وبفتكرها لحد دلوقتي، وأنا شجعت المشاهير يتبنوا أطفال زلزال سوريا وسعيدة أننا غيرنا تفكيرنا في العالم العربي عن التبني.
