باسل ألزارو عن مسلسل حكاية أسيل: طاير من الفرحة بأول بطولة.. وأتمنى فلوس المنتجة ترجعلها
تحدث الفنان باسل ألزارو عن مسلسل حكاية أسيل، والقضايا التي يناقشها العمل، وكيفية ترشيحه للدور.
وقال باسل ألزارو خلال لقائه مع القاهرة 24: مبسوط جدًا وطاير من الفرحة، وتعتبر أول بطولة ليا أنا وثراء مع بعض، وإحساس البطولة جميل ومرعب، عشان إحنا علينا مسئولية إن المنتجة بتقولنا إحنا بنبيع بأساميكوا، فـ الموضوع مقلق شوية، بس إحنا بنعمل كل اللي نقدر نعمله.
وتطرق باسل ألزارو لكشف القضايا التي يناقشها المسلسل، قائلًا: العمل بيناقش قضية السوشيال ميديا بمميزاتها وعيوبها، وهي ممكن تؤدي لـ إيه، ومن نتايج خطيرة ونتايج كويسة، وقضية التنمر بس دي قضية مستترة شوية وفجأة هتظهر.
وأضاف: وفيه قضية مشاريع الخير في القرى والفيوم والمحافظات، وهما عمومًا كذا قضية في 15 حلقة، ودي الحاجة الحلوة، والقضايا متقسمة طرق مختلفة، يعني ثراء ليها طريق فيه قضيتين مثلا، قضية أساسية وقضية فرعية ومنها قضية السوشيال ميديا، وأنا عندي قضيتين رئيستين وهما المشاريع الخيرية والتنمر.
واختتم باسل ألزارو حديثه كاشفًا كيف تم ترشيحه لدوره في مسلسل حكاية أسيل، حيث قال: اترشحت للدور من خلال المنتجة إيمان أبو الدهب؛ لأن أنا اشتغلت معاها في مسلسل دوبامين، وبعد المسلسل ده بشهرين كلمتني قالتلي أنا هاخد الريسك بيك أنت وثراء، وعايز أشكرها على ده وأتمنى إن فلوسها ترجع، وإن شاء الله نكسر الدنيا.
مسلسل حكاية أسيل
ويضم مسلسل حكاية أسيل عددا من الفنانين، وهو من بطولة ثراء حبيل، باسل ألزارو، سلوى محمد علي، أحمد سلطان، إلهام عبد البديع، إسراء رخا، بدرية طلبة، أحمد بلال، ملك بدوي، حسن العدل، وآخرين، وهو من تأليف محمد جلال، وإخراج معتز حسام.
