ظلمتك وقسيت عليكي.. أب يناشد ابنته بالرجوع للمنزل من خلال منشور على فيسبوك
في حالة هي الأولى من نوعها في محافظة أسيوط نشر مواطن يدعى محمود خليل إبراهيم من أبناء المحافظة اعتذارًا لابنته آية، عبر صفحته الرسمية على موقع التواصل الاجتماعي، يطالبها بأن تسامحه وتعود للمنزل بعد تركها المنزل واختفائها.
ظلمتك وقسيت عليكي حقك عليا وسامحيني
وتضمن منشور الأب التالي: بسم الله الرحمن الرحيم، بنتي العزيزة آية أنا عارف إني ظلمتك وقسيت عليكي من غير ذنب علشان كده بقولك قدام العالم كله حقك عليا وسامحيني وتعالي لو مش علشان خاطري أنا علشان خاطر إخواتك اللي بيحبوكي، وانتي عندي أغلى إخواتك.. آية محمود متغيبة من يوم الثلاثاء 7- 3- 2023، من كلية أصول الدين جامعة الأزهر أسيوط، اللي يعثر عليها أو يقدر يساعدني يتواصل معايا وله جزيل الشكر.
وبعد مرور ساعات من نشر المنشور الأول نشر منشورًا آخر تضمن: على فكرة يا آية أنا بنشر علشانك إنتي مش علشان الناس علشان تعرفي إني عرفت متأخر إني قسيت عليكي من غير سبب، إنما يعلم الله من غير قصد وعلشان أنا الوحيد اللي عارف آية بنتي بقولك أنا أبوكي اللي بقولك حقك عليا وأنا اللي بطلب منك السماح علشان أنا اللي ظلمتك.. كفاية كده أنا تعلمت الدرس مع إنه قاسي قوي إنما أنا مسامحك تعالي علشان خاطر نفسك وخاطر إخواتك وبلاش علشان خاطري علشان عارفك زعلانة مني.
وتداول مستخدمو موقع التواصل الاجتماعي فيس بوك اعتذار الأب عبر الصفحات العامة والمجموعات الخاصة بمحافظة أسيوط، مطالبين الفتاة بالعودة لمنزلها رحمة بقلب أبيها.
