اللي ماجاش فرحي حطيته في القايمة السودة.. حسن شاكوش يوجه رسالة شكر وعتاب في أول ظهور بعد زواجه
ظهر مطرب المهرجانات حسن شاكوش في فيديو لايف عبر حسابيه بموقع فيس بوك وانستجرام، في أول ظهور له بعد زواجه، وحرص على توجيه الشكر للنجوم الذين حضروا حفل زفافه، كما وجه رسالة عتاب لمن امتنع عن حضور الحفل.
ووجه حسن شاكوش الشكر إلى النجوم الذين حضروا حفل زفافه، ومنهم تامر حسني ورامي صبري وماجد المصري وإيهاب توفيق ومصطفى قمر وحمو بيكا وعمر كمال وغيرهم، إذ قال: حابب أشكر كل النجوم اللي جت لي الفرح وبشكر كل نجم شرفني في فرحي، وتامر حسني وجوده كبير وشرف ليا وعلى المستوى الشخصي إحنا اخوات وأنا من معجبينه ومن جمهوره وده ما يقللش مني.
وأضاف: بشكر حمو بيكا وعمر كمال وبشكر أحمد بتشان وأحمد شيبة والمدرسة محمود الليثي ويارا محمد وحمادة مجدي وشريف المصري، ورامي صبري وجوده شرف ليا لأن حد كبير وبعشقه ورضا البحراوي ده العشق، والنجم الكبير اللي اتربينا على أغانيه مصطفى قمر ومحمد نور والنجمة وفاء عامر وماجد المصري وعصام صاصا ورندا البحيري والنجم الكبير إيهاب توفيق اللي اتربينا على أغانيه، وحمو بيكا مش أخويا ده قلبي، ومحمد شاهين وحودة بندق ورنا رئيس النجمة الكبيرة.
هنادي مهنا قمر السينما المقبلة
ووجه حسن شاكوش رسالة إلى هنادي مهنا قائلًا: هنادي مهنا قمر السينما اللي جاية وبجد حتة قمر ما شاء الله ربنا يحميها ويخليها لجوزها وأهلها.
كما وجه رسالة إلى الفنان أحمد عصام قائلًا: أجمد فاير شو على مستوى الوطن عربي واسمه أكبر من النار على العلم.
كما أكد حسن شاكوش عذره لبعض الفنانين الذين لم يحضروا لمرورهم بظروف خاصة، ومنهم الفنان مصطفى كامل نقيب المهن الموسيقية قائلًا: ماجاش علشان دراعه مكسور وبقول له ألف سلامة عليك يا حبيبي.
وعذر حسن شاكوش المطرب بهاء سلطان لعدم حضوره حفل زفافه، مشيرًا إلى أنه كان في الكويت قائلًا: الراجل ليه عذره ونفسي كان يكون موجود بحبه جدا وطبعا
كما وجه الشكر إلى وفاء عامر لحضورها حفل الزفاف رغم إصابتها قائلًا: دراعها كان مكسور وجت لي وبقول لها سلامة رجلك.
حسن شاكوش يوجه رسالة لمن امتنع عن حضور زفافه
واستكمل موجهًا رسالة لمن امتنع عن حضور حفل زفافه: أي حد ماجاش له عذره طالما عندك شغل مش هعلق ليك حبل المشنقة إلا بقى لو حد فاضي ومجاش ده موضوع تاني.
إحنا في مركب واحدة
وأضاف: إحنا في مركب واحدة واللي ما تحتاجش قفاه دلوقتي هتحتاج وشه بعدين، واللي مجاش حطيته في القايمة السودة، وأنا ماكنش ناقص لي حد وكفاية أن ماجد المصري ييجي ويقف على المسرح ومصر كلها تشوفه وهو من أنضف الشخصيات اللي عرفتها في حياتي.
تامر حسني شبهنا وابن بلد
وتابع موجهًا رسالة إلى تامر حسني: شبهنا وابن بلد وجايبها من تحت وبيجامل طوب الأرض وبيراضي الدنيا كلها علشان كده هيفضل نجم، ورامي صبري برضه، والناس دي عمرها ما تقع ومش بتروح عليها بالعكس بتزيد وبتعلى أكتر من كده، وطالما ربنا شاور عليه أنه ينجح أنسى يقع، ولو معاك جيش وعاوز توقعه عمرك ما هتوقعه لأن هو معاه ربنا زي ما إحنا معاه ربنا.
في مذيعين عزمتهم وماجوش وعاوزني أطلع معاهم في حلقة
واستنكر حسن شاكوش عدم حضور بعض المذيعين ممن دعاهم لفرحه وبعد انتهاء الفرح وتصدره التريند حاولوا الاتصال بإدارة أعماله حتى يظهر معهم في حلقة، قائلًا: الغريب أن في مذيعين عزمتهم على الفرح ومجوش ولما الفرح عمل تريند عاوزني أطلع حلقة، أنت عبيط ولا إيه مش فاهم! عزمته ومجاش ولما الفرح عمل تريند عاوزني أطلع معاه حلقة هو يا عبيط يا أهبل.
حسن شاكوش يحضر لأغاني جديدة
وأشار حسن شاكوش إلى أنه يجهز لأغاني كثيرة خلال الفترة المقبلة مع رضا البحراوي وعمر كمال ومحمود الليثي قائلًا: انتظروا شغل جامد في رمضان وهينزل على العيد مع رضا البحراوي وفي حاجات مع الليثي وعمر كمال.
واختتم حسن شاكوش حديثه قائلًا: الفرح كان متعب جدا يا جماعة لدرجة ما تتخيلوهاش وكنت بقول يا رب الفرح يخلص بسرعة، ويمكن كنت متعصب شوية لأني كنت خايف يحصل أي حاجة في الفرح تبوظه.
