منة فضالي تكشف تفاصيل شخصيتها في جعفر العمدة: دور صعب ومحتاج تركيز
كشفت الفنانة منة فضالي، تفاصيل شخصية نرجس التي تقدمها في مسلسل جعفر العمدة، والمقرر عرضه في السباق الرمضاني 2023، بجانب حديثها عن تعاونها مع الفنان محمد رمضان بطل العمل، والمخرج محمد سامي.
وقالت منة فضالي، خلال لقائها مع شركة ميديا هب - سعدي جوهر: نرجس شخصية فكاهية ومخها على قدها وتفكيرها محدود وطيبة ورومانسية وشقية، شخصية تحس إنها كوكتيل من الشخصيات الصعبة فيها شغل كتير دور صعب ومحتاج مجهود وتركيز، وحاولت على قد ما أقدر إني أشتغل على نفسي، وأستاذ محمد سامي مش سايبني ومش سايب حد وعامل مجهود كبير مع الكل وبالأخص أنا، وإن شاء الله يسيب أثر طيب.
وعن وجه التشابه بين شخصيتها وشخصية نرجس التي تقدمها خلال أحداث مسلسل جعفر العمدة، فعلقت منة فضالي قائلة: نرجس تقريبًا نصها زيي لأنها مجنونة وبتتصرف بتلقائية ورومانسية.
منة فضالي: محمد رمضان عبقري
كما تحدثت الفنانة منة فضالي، عن تعاونها مع الفنان محمد رمضان، في مسلسل جعفر العمدة، قائلة: محمد رمضان أول مرة أشتغل معاه وأنا بحبه جدًا على المستوى الشخصي، والشغل معاه ممتع جدًا وهو عبقري وبيعمل مجهود كبير في الشغل وأنا لما بمثل معاه بسرح معاه وباخد كتير أوي في المشاعر، أنا بستفيد منه مع أنه أصغر مني، هو متفوق أوي في حاجات كتير وفي نفس الوقت في تنوع في الأدوار، وبقوله مبروك من قلبي ومبسوطة إني اشتغلت معاك.
منة فضالي: محمد سامي من المخرجين الكبار اللي ليهم تاريخ
وأعربت منة فضالي عن سعادتها بتعاونها مع المخرج محمد سامي، قائلة: أستاذ محمد سامي صديق عزيز على قلبي من عمر، والعمل معاه مميز وبيحب الممثل أوي ومش بيفرق في المعاملة وبيدي كل واحد حقه، هو مخرج بيذاكر شغله وبيذاكر للممثل وبيوصله المشاعر والإحساس وبيبقى عايز يشوفه أحسن واحد في الدنيا، وهو أكتر واحد متبهدل معانا هو أستاذ محمد سامي، بقوله شكرًا وثقته فيا كبيرة ويارب أكون قدها وبتشرف بالشغل معاك، وفي الـ CV إني اشتغلت مع المخرج محمد سامي دي حاجة كبيرة بالنسبة ليا، لأنه من المخرجين الكُبار اللي ليهم تاريخ وبصمة عن أي مخرج تاني.
