مفرحتش لما شفت شكلي.. لبنى ونس تكشف تفاصيل استخدام محمد سامي تقنية لتصغيرها في جعفر العمدة
تصدرت الفنانة لبنى ونس تريند محرك البحث على جوجل مواقع التواصل الاجتماعي، بعد ظهورها في الحلقة السادسة من مسلسل جعفر العمدة بطولة الفنان محمد رمضان.
وظهرت لبنى ونس في الحلقة السادسة من مسلسل جعفر العمدة في مشهد فلاش باك، وهي بملامح أصغر بكثير من عمرها، مما أثار تساؤلات الجمهور، واعتقد البعض أن المخرج محمد سامي استعان بدوبليرة.
بينما اعتمد المخرج محمد سامي على استخدام تقنية De-aging، والتي يستخدما بعض المخرجين لتصغير عمر الفنانين، خاصة في مشاهد الفلاش باك في السينما والتلفزيون.
لبنى ونس: اتفاجأت بشكلي
وقالت لبنى ونس في حديثها مع القاهرة 24: اتفاجأت بشكلي لما اتفرجت على الحلقة، لأن هما حطولي مكياج صغرني حاجة بسيطة، ولكن محمد سامي استخدم تقنية في تصغير شكلي.
وأضافت لبنى ونس: مفرحتش لما شفت نفسي صغيرة، لأن كل سن وله جماله، وأنا استمعت بالسن اللي ظهرت به وعشته كله، وكنت راضية، ليه أسيب سني وأرجع سن معشتوش، وفي حياتي الطبيعية مش بحط مكياج ولا بصبغ شعري، وبكون سعيدة بكل لحظة بمر بيها وكل خط في وشي وتجعيدة وشعراية تاريخ بعتز به وعمر جميل عشته.
وأكملت: وأنا بصور مكنتش عارفة محمد سامي هيعمل إيه، ولكن هو مخرج ذكي وشاطر، ولما عملولي مكياج صغرت بس مش للدرجة دي، ولما اتفرجت على الحلقة اتفاجأت، وشكلي في الحلقة مختلفش عني وأنا صغيرة بس أنا كنت أحلى؛ لأني في الآخر خلقة ربنا أحلى من أي حاجة، وعمليات التجميل وشد الوش بتخلي الوش واقف مش بيعبر صح وشابو محمد سامي.
واستكملت لبنى ونس حديثها قائلة: أكتر كومنت لفت انتباهي إني أكيد فرحانة إني رجعت صغيرة، ولكن في الحقيقة أنا مش فرحانة لأن كل سن وله جماله، ولما كنت أتم 30 كنت بقول إني عندي 31 سنة وبكبر نفسي سنة، وعمري ما حطيت ميك آب، ومش بحبه، إلا إذا الدور بيتطلب مني كده، ومش بشوف الممثلة اللي بتحب تظهر حلوة تنفع تكون ممثلة لأنها لازم تقدم الشخصية لأن التمثيل يعني تقمص.
ووجهت لبنى ونس نصيحة للفتيات قائلة: اسعدي بكل لحظة بتمري بيها، علشان لما الزمن يحطها في وشك وشعرك تحمدي ربنا عليها، وخليكي راضية لأن الرضا هو السعادة.
