آدم الشرقاوي: حسيت إني ابن يسرا.. وهي عايزة تقدم أعمال مختلفة للجمهور
تحدث الفنان آدم الشرقاوي، عن مشاركته في مسلسل 1000 حمد لله على السلامة، لـ الفنانة يسرا، الذي يُعرض ضمن السباق الرمضاني الجاري.
وقال آدم الشرقاوي في تصريح خاص لـ القاهرة 24، عن مشاركته في مسلسل 1000 حمد لله على السلامة: أنا طالع ابن أستاذة يسرا، واختي مايان السيد، إحنا أبونا بيموت في المسلسل، وبنقرر نسافر مصر علشان الميراث، والحكاية بتبدأ من هنا، وبندخل في كوارث، وحابب دوري وحاسس إنه مختلف لأنه كوميدي وحاجة جديدة عليا.
وعن تعاونه لأول مرة مع الفنانة يسرا، علق آدم الشرقاوي قائلًا: أستاذة يسرا من أطيب الناس اللي قابلتها في حياتي وأهم حاجة عندها الشغل، هي عايزة تقدم حاجة حلوة ومختلفة للناس، والموضوع صعب عليها إنها تقدم حاجة مختلفة لأنها عملت كل حاجة، وهي بتعشق الشغل وبتاخد بالها مننا، وأوقات بحس إني ابنها، وبقول إيه كل الحب ده شكرًا أوي، والشغل معاها لذيذ أوي.
أعمال مسلسل آدم الشرقاوي
ومن جهة أخرى، يخوض الفنان آدم الشرقاوي أولى بطولاته المطلقة من خلال فيلم خمس جولات، والذي تدور أحداثه حول تحديات الشباب في رياضة الـ MMA.
أبطال مسلسل 1000 حمد لله على السلامة
ويشارك في مسلسل 1000 حمد لله على السلامة العديد من الفنانين مع يسرا، منهم: آدم الشرقاوي، مايان السيد، محمد ثروت، شيماء سيف، عنبة، سما إبراهيم، محمد أوتاكا، والمسلسل من تأليف محمد ذو الفقار، وتحت قيادة المخرج عمرو صلاح، وإنتاج جمال العدل.
