أمينة خليل: تعاطفت مع شخصية نادين.. والهرشة السابعة موضوع مهم تناوله
تحدثت الفنانة أمينة خليل عن مسلسلها الهرشة السابعة، والذي عُرض في النصف الإول من شهر رمضان، وحقق نجاح كبير لدى الجمهور.
وقالت أمينة خليل في حوارها مع القاهرة 24، عن شخصية آدم التي جسدها الفنان محمد شاهين خلال أحداث مسلسل الهرشة السابعة: تعاطفت مع آدم أنه كل ما كان بيعملها حاجة حلوة كانت تعلق وتعترض، وهو كان متلغبط فكان لازم تشرحيله الموضوع اللي هو مش عارفه وتستحمليه، لأن غريزة الأمومة عندنا كستات لكن مش عنده، هو مش فاهم فلازم تعلميه من غير ما تحسسيه أنك بتديله درس في الأدب والأخلاق.
وتابعت أمينة خليل، متحدثة عن شخصية نادين التي جسدتها في مسلسل الهرشة السابعة: نادين شخصية مدية نفسها الحق أنها تحكم على الناس وتنتقدهم لكن في الآخر رفعت المراية قدام نفسها واعترفت بعيوبها دي لما كانت قاعدة مع شادي وبتقول بحاول أبقى مش كدة، وهي دي الطبيعة البشرية، إن مفيش حد ملاك ولا شيطان، كلنا في الجزء الرمادي، دي حاجة تعاطفت فيها مع آدم.
وأضافت أمينة خليل: تعاطفت مع نادين في حتة أنها أم لتوأم دي حاجة تخلي أي أم تتجنن، والمشهد اللي هي بتقول أنا عايزة استحمى كانت بتتكلم بجد بـ انهيار وممكن تنفجر.
كما أكدت الفنانة أمينة خليل معرفتها بما هي الهرشة السابعة، والتي تم اخيتار اسم مسلسلها الهرشة السابعة على أساسها، قائلة: أعرف يعني إيه الهرشة السابعة من صحباتي بيقولولي إيه اللي حصل فاكرة زمان أيام الفرح كنا مبسوطين إزاي واكتشفت أن ده رأس موضوع مهم جدًا لازم نتكلم فيه، والأهم هنتناقش فيه إزاي لازم يروح بين إيدين حد بيفهم وحنين في معالجة الموضوع ومش منحاز، حد يقدر يدي وجهة النظر من الناحيتين الستات والرجالة، بحيث المتفرج يبقى متفهم وجهة نظر الست والرجل وإننا شايفين الاتنين معاهم حق.
أبطال مسلسل الهرشة السابعة
ضم مسلسل الهرشة السابعة العديد من الفنانين، أبرزهم الفنانة أمينة خليل، محمد شاهين، علي قاسم، أسماء جلال، وآخرين، ومن إخراج كريم الشناوي.
