محمد سامي: محمد رمضان أشطر ممثل في مصر
أعرب المخرج محمد سامي عن سعادته الشديدة بالنجاح الكبير الذي حققه مسلسله الرمضاني جعفر العمدة بطولة الفنان محمد رمضان.
وقال محمد سامي، خلال تصريحات لـ Et بالعربي: الحمد لله جعفر العمدة حقق النجاح اللي الواحد تمناه وأكتر كمان، وتفاعل معاها العالم العربي، وجعفر العمدة منجحش كدة بالصدفة فيه حوالي 800 شريك في نجاح المسلسل ده.
كيمياء مشتركة
وتابع: بيننا أنا ومحمد رمضان كيمياء واستيعاب في الأفكار، ومش كل الممثلين اللي بيشتغلوا معايا ممكن أطلب منهم نفس الطلبات اللي بطلبها من رمضان في التمثيل، لأن قدراته غير عادية، بكتب وأنا مرتاح ومحمد بيجتهد معايا الحاجة اللي ممثل بيلاقيها لذلك بيسلم وبيثق في اللي أنا بعمله.
وأضاف: أول حاجة قولتها لمحمد رمضان في شخصية جعفر العمدة، أن ده راجل جنتل شعبي، كنت بعمل شخص مبني على فكرة التناقضات وفيه العادات اللي تخلي الناس تتوحد مع الشخصية ويحبوها، وبيقدم العائلة ودي أهم حاجة فيه كبطل شعبي، وكلمت محمد مرة قبل التصوير بـ أسبوع قولته لو الشخصية متقدمتش بطريقة تدخل القلوب المسلسل ده مش هينجح، وكان بيبهرني هو ممثل مش عادي.
واختتم محمد سامي: مصر مليئة بالنجوم وعامرة بالنجوم، ومحمد رمضان أشطر ممثل في مصر حاليًا وأكيد مش عايز حد يبقى زعلان، ولكن محمد رمضان قدراته التمثيلية مش عادية، وكل النجوم فوق راسي، ودايمًا هبقى منحاذ لـ محمد رمضان لأن أكبر نجاحاتي معاه، ومعتمدش عليه مرة وخذلني، ودايمًا أقول أدي لمحمد سنتي يرجع متر.
