محمد رمضان: عمر الشريف كان طوق نجاة اتحدفلي وأنا بغرق في بحر اليأس.. ومش طموحي أكون عالمي
تحدث الفنان محمد رمضان عن النجم الراحل عمر الشريف، وكيف أثر في مشواره الفني، واصفًا بأنه كان بمثابة طوق نجاة له.
وقال محمد رمضان خلال استضافته في برنامج صاحية السعادة مع الفنانة والإعلامية إسعاد يونس، إنه تعاون مع عمر الشريف عام 2007 في فيلم حنان وحنين.
عمر الشريف أبويا الروحي
وأضاف محمد رمضان: عمر الشريف كان أبويا الروحي وكان بمثابة طوق نجاة اتحدف لي وأنا بغرق في بحر اليأس، لأني ما كنتش بشتغل وقتها ومفيش دليل يقول أني ممكن أكمل وأنجح، وطلع النجم العالمي الوحيد في مصر يقول ده اللي اختارته يكمل مسيرتي وشايفه هيكون أحسن ممثل في مصر وما فهمتش كلامه وما فدنيش على مستوى الشغل وجالي أدوار ولكن أداني قوة وحسسني أني ماشي صح.
وتابع محمد رمضان: بدأت أقنع نفسي أن هعتبر أني ما سمعتش كلام عمر الشريف علشان لو صدقته مش هعمل به.
وتابع محمد رمضان: إيناس بكر مديرة أعمال عمر الشريف مرة قالت لي أنت متأكد من اسم محمد رمضان ومتأكد أنك عاوز تكمل مشوارك الفني به، قلت لها والله اه، ورد عمر الشريف قال لها ده أحلى اسم لأن محمد أكتر اسم موجود في مصر ورمضان أكتر شهر ما تحسيش به غير في مصر ومحمد رمضان يعني مصر.
مش طموحي أكون ممثل عالمي
وأكد محمد رمضان أنه لا يطمح لأن يكون فنان عالمي، موضحًا: مش في طموحي أني أكون عالمي حتى الآن لأن الممثل فرد بيمثل فئة أنا ممثل مصري وأنا بمثل جميع الفئات المصرية ولو عشت 100 سنة مش هعمل واحد في المية من الشخصيات اللي ينفع أعملها من بلدي فعمر ما كان طموحي أمثل بره أو أمثل شخصيات مش عايشة جوه محيطنا العربي والمصري.
وتابع: الأسرع في الانتشار والوصول للعالم خط المزيكا وهو أسرع من التمثيل، لأني من خلاله سهل أوصل لباقي الكر الأرضية أسرع من التمثيل.
