البلوجر سارة محمد: ناس بتستغلني ماديًا.. ومحدش يحاول يبعتلي فلوس على أي حساب
ظهرت البلوجر سارة محمد محمود في فيديو جديد لها، عبر موقع تبادل الصور والفيديوهات إنستجرام، تحذر المتابعين ورواد مواقع التواصل الاجتماعي من التبرع لها.
البلوجر سارة محمد تحذر المتابعين من استغلالها
وقالت البلوجر سارة محمد: محدش يحاول يبعت فلوس لأي رقم لأن أنا بيتم استغلالي ماديًا، ومفيش جنيه بيوصلني من حد، ومش محتاجة تبرعات من حد، أنا لما أحتاج حاجة أو لو في عملية هتنجح في وقتها أنا هطلع وهقول إني محتاجة، لكن أنا حاليا مش محتاجة حاجة ومفيش حاجة بتوصل لي.
وتابعت سارة وهي تسأل البلوجر عمر: أنت شايفني مجنونة، في ناس كتير بتحاول تطلعني مجنونة، لكن أنا هنا عشان أشارك معاكم فرحي وحزني اطمنكم عليا وعلى علاجي، وأنا بكامل قوايا العقلية، وأنا عارفة انكم تقدروا تحموني.
البلوجر عمر حسين يروي تفاصيل جديدة عن حالة سارة محمد
وقال البلوجر عمر حسين، معلقًا على الفيديو عبر صفحته الشخصية بموقع إنستجرام: رغم مقابلتي لسارة مرة واحدة من شهور إلا أنها أحبت النهاردة تظهر معايا عشان توصلكم الرساله دي.. البنت الطيبة الجميلة دي بعد الحادثة اللي فقدت فيها بصرها بشكل كامل، تم نشر حالتها على السوشيال ميديا بشكل كبير ومع التعاطف الكبير من كل الناس انهالت المساعدات من أصحاب الخير من دول الخليج ومن داخل مصر.
وتابع عمر: المساعدات دي بمبالغ يصعب حصرها لكن لكم أن تتخيلوا عددها لأنها فعلا مهولة بشكل لا يصدق.. ربنا يجازي أصحاب الخير ده مبدئيا.. لكن اللي سارة اكتشفته أنه تم استغلال حالتها دي بدون علمها وإن المبالغ دي بتتاخد من الناس بدون وجه حق لأنها مش في احتياج ليها.
وأضاف عمر حسين: الدائرة المقربة لسارة بدون ذكر أسماء وده طلب منها شخصيا قبلت إنها تستعطف الناس بمرضها وحالتها لكسب مزيد من الفلوس، ولحد ما في يوم من الأيام اكتشفت ساره الكارثة دي، ولما رفضت تم تهديدها إنها هتتاخد وتتحط في مستشفي الأمراض العقلية.
