أحمد فهمي: اللي بيجيب إيرادات أكتر المفروض اسمه يتكتب الأول وملهاش علاقة بتاريخ الفنان
كشف الفنان أحمد فهمي عن ردة فعل أسرته بعد مشاهدتهم مسلسله الرمضاني سره الباتع، كما تطرق إلى تصريحه عمن يضع اسمه أولًا على تتر الأعمال السينيمائية.
وقال أحمد فهمي، خلال ندوته في القاهرة 24: هما متابعين المسلسل، وأنا شخصيتي مختلفة عن كريم، ووالدتي بعتتلي بتقولي أوعى يكون فيه نكد، افتكرتها بتقول عليا أنا وهنا، وقالتلي هما بيخططوا لقتل حامد في المسلسل، وهما مش زيي، أنا أول ما العمل يخلص بشوف ردود فعل الناس وخلاص، ومش بتفرج على نفسي، والحالة الوحيدة اللي اتفرج فيها على نفسي لو فيه مشكلة أو حد يقول في المونتاج.
وتابع أحمد فهمي: عمري ما بقول أنا أعلى أو أحسن، ممكن أقول اللي يجيب إيرادات أكتر اسمه يتحط الأول على التتر، لو مثلًا اشتغلت مع أحمد عز مش فكرة مين الأقدم أو عامل تاريخ، هي إيراداته أعلى فاسمه يتكتب الأول، وعمري ما أقول إني الأعلى الإيرادات في جيلي.
آخر أعمال الفنان أحمد فهمي
وكانت آخر أعمال الفنان أحمد فهمي هي مشاركته في مسلسل سره الباتع، الذي تم عرضه في السباق الرمضاني 2023، وضم العمل مجموعة كبيرة من أبرز الفنانين ومنهم، خالد الصاوي، حنان مطاوع، هالة صدقي، أحمد فهمي، ريم مصطفى، محمود قابيل، حسين فهمي، أحمد السعدني، أحمد عبد العزيز، مصطفى درويش، ومن إخراج خالد يوسف.
