محمد فهيم: مفيش حارة مش عارفة مين تشارلي تشابلن.. والمسرحية هتوصل لكل العالم
تحدث الفنان محمد فهيم، عن تحضيرات العرض المسرحي تشارلي تشابلن، والذي حقق من خلاله نجاحا كبيرا، مؤكدًا أنه بتقديم العرض حقق حلما من أحلامه في الوسط الفني.
وقال محمد فهيم في لقائه مع القاهرة 24: مفيش حارة في العالم دلوقتي متعرفش اسم تشارلي تشابلن شخص عايش العمر ده كله ومؤثر إزاي، تشارلي تشابلن ده كان نموذج بالنسبة ليا وأنا في الجامعة، وهو بنى اسمه بعد ما مثل وأنتج وكتب وألف الموسيقى التصويرية بتاعة أعماله وأخرج شغله، وده من أول يوم اللي أنا بشتغل عليه إني اكون راقص وممثل وأعمل مزيكا وهدخل أخد كورسات إخراج وفاضل بس يبقى عندي الاستوديو بتاعي والإنتاج.
وتابع: أنا من زمان بحلم أعمل تشارلي تشابلن، ومن 2013 بقول ده حلمي، وبعدين في شهر 6 سنة 2021 صديقي قالي أنه عايز يعمل مسرحية موسيقية قولتله طيب أنا عندي حلمي تشارلي تشابلن، واتقابلنا وقعدنا 8 شهور بنعمل دكتوراه في تشارلي، وقرأنا كتابه وكتاب ابنه عنه ووصلنا لمعلومات كتيرة جدًا وبدأنا نعمل سيناريو مبدئي.
وأضاف: وروحنا للدكتور مدحت العدل، وطلبنا منه يكتب لنا سيناريو مسرحية تشارلي تشابلن، وقالي محدش هيكتبها غيري، كان عندنا يقين من ربنا أن النجاح هيحصل، وده أول عرض موسيقي عن تشارلي تشابلن في العالم العربي، وده حدث كبير جدًا وجمهورها موجود لغاية النهاردة، والعرض ده هيوصل لكل جمهور تشارلي تشابلن في كل أنحاء العالم حسب الخطة للجولة العالمية للعرض.
محمد فهيم: مبخفش من الفشل والنجاح بييجي بالمغامرة
وأكد الفنان محمد فهيم، أنه لم يخش الفشل في مسرحية تشارلي تشابلن، موضحًا: أنا مبخفش والنجاحات الكبيرة مش بتحصل غير بمغامرة كبيرة بشرط التحضير الجيد واحترام الجمهور، والإبداع إزاي هتنفذ الفكرة وإزاي هنقدم تشارلي تشابلن لجيل جديد، ودي اللي كانت الفكرة اللي عند المخرج واختيار العناصر والكاتب الكبير دكتور مدحت العدل، بالإضافة إلى الاستعراضات اللي كانت موجودة في العرض، واشتغلنا بطاقة حب وعدد ساعات مش طبيعية.
