شيرين عبد الوهاب تكشف مفاجآت لجمهورها: السوشيال ميديا بتاعتي اتسرقت وهرفع قضية.. وكتبت قصة حياتي في فيلم
تحدثت الفنانة شيرين عبد الوهاب عن سبب ابتعادها عن السوشيال ميديا مؤخرًا، مشيرة إلى أنها تعرضت للنصب من أحد الأشخاص الذي استولى على حساباتها الشخصية.
وقالت شيرين عبد الوهاب خلال مؤتمر صحفي على هامش حفلها بدبي: أنا كنت معزولة تمامًا والسوشيال ميديا بتاعتي اتاخدت مني، واحد اسمه محمد الشاعر حصل نصباية كبيرة وخد السوشيال ميديا بتاعتي، وأنا برفع عليه قضية وبرجعها إن شاء الله، وكل حاجة هتعرفوها مني.
وفاجأت شيرين جمهورها بكتابتها فيلم عن حياتها، قائلة: بكتب فيلم عن حياتي وهيكون في بنت هتعمل دوري، وأنا صغيرة، ومينفعش بنت من بناتي لأنهم بقوا أطول مني، انا بنتي مريم عازفة ماهرة، لكن مبتحبش الشهرة وهي صح.
حفل شيرين عبد الوهاب في دبي
وأطلت شيرين عبد الوهاب على جمهورها أمس في حفلها بدبي، بوزن منخفض وإطلالة جذابة لفتت أنظار الألاف الذين حضروا الحفل حيث شهد حضورا كبيرا.
وغنت شيرين عبد الوهاب مجموعة كبير من أغانيها وسط حركات عفوية ورقاصات خفيفة، كما غنت للفنانة وردة، وكوكب الشرق أم كلثوم.
سقوط شيرين عبد الوهاب على المسرح
وفي مشهد مفاجئ، سقطت شيرين عبد الوهاب خلال غنائها على المسرح، إلا أنها أنقذت الموقف، ومازحت جمهورها قائلة: ما يقعش إلا الشاطر.
وقالت شيرين عبد الوهاب، بعدما نهضت من سقوطها: بصوا رجلي ازرقت إزاي، هرفع قضية، اكتب كده هرفع قضية، لأن اللي بيحصل مع الفنان ده قلة ذوق والله العظيم حرام، شوف اللي صار مع عبد الله، بعدين ليا تصرف تاني، شيرين رجعت تاني، هطلب تعويض كبير، يالا خلينا نأمن مستقبل العيال.
وتابعت شيرين عبد الوهاب: شوفوا والله.. بجد شوفوا كل فنان حصل معاه موقف زي ده بسبب السماعات ديه، المفروض تتدفن في المسرح عشان المطرب ميقعش.. ولكن للأسف المنظمين عمرهم ما بيتعلموا، لكن عادي ما يقع إلا الشاطر، بجد حاجة صعبة.. ودلوقتي بكرة على السوشيال ميديا هيسيبوا كل حاجة وشوفوا شيرين وقعت، أنا المفروض دلوقتي لو أنا مأمنة على رجلي أخد منكوا قد إيه من المنظمين، بس يلا معلش، شوفوا اللي بيحصلنا.
كما علقت شيرين عبد الوهاب، خلال المؤتمر الصحفي، على سقوطها في الحفل، وقالت: إحنا واخدين على الإصابات، في ناس هتجودها على السوشيال ميديا، وهتعملها سلوموشن، وهطمن على نفسي في المستشفى دلوقتي.
