بحارة مسلسل تحت الوصاية: منى زكي شخصيتها حقيقية وكنا محظوظين بالعمل معها.. والتصوير في البحر مُهلك
تحدث الفنانان أحمد عبد الحميد وعلي صبحي، عن تعاونهما مع الفنانة منى زكي في مسلسل تحت الوصاية، والذي قدما خلاله شخصية بحارين، حيث عرض في موسم رمضان الماضي.
وتحدث علي صبحي، صاحب شخصية عيد في مسلسل تحت الوصاية، في ندوة تكريمه بالقاهرة 24،عن الفنانة منى زكي، قائلا: مكنش في أي غيرة في اللوكيشن بالعكس كان في تعاون كبير، وأستاذة منى كانت بتدعمنا طول الوقت ومكنش في أي تكبر، هي كانت عايزة كل واحد فينا في اللوكيشن أحسن حاجة طول الوقت، وإحنا اشتغلنا حاجات كتير مكناش بنشوف ده قبل كده، إن يبقى النجم سوبر ستار بطل العمل عايز كل الناس تبقى حلوة، مشوفناش ده قبل كده.
وتابع: أستاذة منى كانت بتبذل مجهود طول الوقت علشان اللي حواليها يبقوا مرتاحين، عارفة كويس أنها ممثلة في العمل ومعاها زملاء مش إن حد أكبر من حد خالص، ودي حاجة أتأثرت بيها جدًا قد إيه شخصيتها طبيعية وحقيقة وبتساعد كل الناس ومبتزهقش من المساعدة والأسئلة، بالعكس بتجاوب بحب ولطف شديد جدًا، وأنا شخصيًا كنت محظوظ إني أمثل معاها.
أما عن ظروف تصوير مسلسل تحت الوصاية، أوضح الفنان أحمد عبد الحميد صاحب شخصية شنهابي: النجاح مكنش بسهولة خالص، وأكتر ناس تعبت في المسلسل كان فريق العمل لأن مكنش عنده فرصة للراحة نهائيًا ومبيوقفوش شغل خالص، والتصوير في البحر مش زي التصوير في الاستوديو والرفاهية، التصوير في البحر مُهلك.
وأضاف: إحنا مزنوقين في مركب واحدة وفي اللي بيخاطر من عمال التصوير والإضاءة علشان يطلع المشهد بالشكل المطلوب، إحنا في البحر بجد والموضوع كان مرعب وزي ما الناس بتقول البحر قلاب، وكانت ظروف التصوير صعبة جدًا، خاصة إن كان في ناس عندها دوار البحر، ومكنش ينفع أن ناكل أي حاجة واللي ناكله يكون كله حادق علشان ضغط الدم.
واستكمل: أعتقد أن كل حد كان شغال في مسلسل تحت الوصاية يقدر يعمل أي حاجة بعد كده بعد اللي هو عمله ده، ومكنش في مشهد سهل في المسلسل ده.
