غادة عبد الرازق: إحنا مش بنتقبل تغيير الممثل لشكله.. وانتقدوا مسلسل تحت الوصاية عشان حواجب منى زكي
تحدثت الفنانة غادة عبد الرازق، عن الانتقادات التي تتعرض لها الأعمال الفنية باستمرار، موضحة أن ثقافتنا كشعب لا نتقبل أن يغير الممثل من شكله، مثلما نرى في السينما العالمية.
وقالت غادة عبد الرازق، خلال ندوتها بالقاهرة 24: الجمهور بقى من أول حلقة لأي عمل يفضل ينتقده، ده كمان بقى بينتقد من أول ما البوستر ينزل، زي ما عملوا مع مسلسل تحت الوصاية.
وتابعت قائلة: المسلسل كان لسة منزلش، وبينتقدوا شكل منى زكي وحواجبها، طب ما ممكن الشخصية هي اللي تكون طالبة كدة، إحنا بنتفرج على ممثلين برة بنلاقيهم ممكن بيزيدوا بالسبعين كيلو عشان دور معين، وبياخدوا أوسكار على ده، لكن إحنا مش بنتقبل الممثلة تطلع بشكل تاني أو كبيرة في السن أو محجبة.
في سياق مختلف، أكدث غادة عبد الرازق أنها أكثر ممثلة غيرت من جلدها خلال مشوارها الفني بأكمله، حيث قالت: أنا شايفة إن أنا أكتر ممثلة غيرت في جلدها، مخلتش دور معملتوش.
وأضافت: الحاجة الوحيدة اللي معملتهاش في التليفزيون هو الدور الصعيدي بس عملته في السينما والحمد لله خدت عنه جوايز كتير، والتليفزيون عملت الدور الكوميدي والنفسي وكل الأنواع، ومسلسل السيدة الأولى مفيش حد عمل نوعية العمل دي لا في التليفزيون ولا في السينما، إن ست تكون رئيسة جمهورية، وكانوا بيهاجموني على العمل وقالوا مش حلو.
مسلسل تلت التلاتة
على جانب آخر، شاركت غادة عبد الرازق في موسم رمضان 2023، من خلال مسلسل تلت التلاتة، بطولة كل من: محمد القس، صلاح عبد الله، أحمد مجدي، ليلى أحمد زاهر، وآخرين، ومن إخراج حسن صالح.
