لأول مرة.. مصطفى هريدي يكشف تفاصيل حادث الشيخ زايد: أنا مش مدمن ولا كنت شارب
تحدث الفنان مصطفى هريدي عن حادث الشيخ زايد وتسببه في إصابة 4 أشخاص عن طريق الخطأ، بعدما صدمهم بسيارته، حيث كانت المحكمة حينها أصدرت حكمًا بحبسه لمدة سنة وكفالة 2000 جنيه قبل الصلح بينه وبين المصابين حيث تنازل الضحايا عن الدعوى أمام محكمة جنح مستأنف الشيخ زايد، والتي قضت بانقضاء الدعوى الجنائية.
مصطفى هريدي يكشف تفاصيل حادث الشيخ زايد
وقال الفنان مصطفى هريدي خلال لقائه في برنامج الستات: الحادثة ما أثبتتش إني مدمن وشارب، أنا نمت لأني كنت بسعى في شغل غير شغل الفن ومسافر في الغردقة بقى لي أسبوع، وأغلب وقتي بصحى بدري وبقابل ناس في النهار وبنام متأخر، وفي أسبوع عدى عليا إجهاد، واللي حصل قلة نوم ونمت على الدريسكون وبتحصل لأي حد وكتير اتعرضوا ليها، والناس بتبص لينا بصة مختلفة وبتصدق الوحش قبل الحلو والحاجات دي لم تثبت.
وأكد مصطفى هريدي أن الحادث لم يتسبب في وفاة أحد وأن المصابين تم شفائهم قائلًا: الولاد كلهم خفوا وكل حاجة خلصت، ومفيش حد توفي والولاد ماكنوش يعرفوا إني ممثل وهما بسطاء وطيببن وشباب صغير ومن بيوت محترمة ومن إمبابة اللي فيها الأصالة وناس كويسين، واللي حصل أن السوشيال ميديا راحوا بيوتهم وسجلوا معاهم فيديوهات وكانوا بيتعاملوا مع الولاد وهما تحت تأثير العلاج، وخلوهم يتكلموا كلام مش حقيقي.
وأردف قائلا: الناس مش عاوزين حاجة ولكن المحامين دخلوا في الموضوع وقالوا لهم إنه ممثل ومعاه ملايين، وهنأمن لكم مستقبلكم ولما روحت بيوتهم لقيتهم ناس بسطاء وقالوا مش عاوزين حاجة وهو قضاء وقدر وهما ناس في منتهى الاحترام واتصالحنا لأني عوضتهم عن تلفيات العربية.
وأردف قائلا: بشوف فيديوهات ليا إني ماشي أفتري على الناس واللي حصل ضرر وبسأل ليه بتوع السوشيال ميديا ليه بيضروني وبيأذوني وبيشوهوا سمعتي والولاد خفوا واتعالجوا وعايشين حياتهم طبيعي.
