صاحبة فيديو روب الفلوس: كنت فرحانة بالتخرج من الجامعة وأبويا حب يعمل حاجة تسعدني
تداول رواد مواقع التواصل الاجتماعي فيس بوك، مقطع فيديو تظهر فيه إحدى طالبات كلية الآداب جامعة سوهاج، أثناء حفل تخرجها، وإهداء والدها روب من العملات النقدية فئة الـ200 جنيه، ما أثار حالة من الجدل الواسعة بين رواد السوشيال ميديا ما بين مؤيدٍ ومعارض.
تعليق صاحبة روب العملات النقدية
وقالت الطالبة نورا عادل صاحبة الواقعة: كنت فرحانة وأهلي زيي فرحانين بيا مش أكتر ولا محدثين نعمة ولا فشخره، ولا أنا هدفي كسر قلوب الغلابة واللي مش قادرين، ولا أنا أبويا مش كويس زي ما قولتوا، ولا أنا فلاحة برضو، ولا أنا أي حاجة خالص من اللي اتقال.
وأضافت الطالبة نورا لـ القاهرة 24، أن رواد مواقع التواصل الاجتماعي انتقدوها بشكل مهين، ما تسبب في كسر فرحتها بالنجاح والتخرج، معتبرة أن ما حدث خلال الحفل هو نوع من التعبير عن الفرحة ليس أكثر، حلى حد قولها.
كما كتبت الطالبة نورا منشورًا عبر صفحتها على موقع التواصل الاجتماعي فيس بوك، قالت فيه: أنا مش عارفة أبدأ منين وإزاي، بس بجد مكنتش متخيلة اللي يحصل دا، أنا حد عادي خالص، كل الفكره إن أبويا مبسوط بيا بعد 16 سنة تعليم، ودي طريقته اللي حب يعبر بيها عن فرحته، أنا شغالة مع بابا من تالتة ابتدائي لغاية دلوقتي، ودي حاجة مفرحاه مني جدا، وحب يعمل حاجة تفرحني، أنا كمان بفلوسنا وتعبنا ولا احنا شحاتين ولا بيتنا مفهوش كباية زي التانية زي ما أغلبكم قال، ولا احنا بنتباهى بحاجة زي دي والله.
وأكملت: اللي خلي بابا يفرح أكتر إني جبت تقدير عالي في مشروع تخرجي، وإني الوحيدة اللي قدرت أناقش مع الدكاترة وأخلى مشروعي حاجة الكل يتكلم عنها، فخورة بنفسي وفخورة بأبويا جدا لأنه نور عيني، ومش مسامحة أي حد جاب سيرتنا بالوحش، حسبي الله ونعم الوكيل بجد في أي حد أذاني نفسيا، وهفرح وأركز في مستقبلي ولا هيهمني أي حاجة.
وواصلت: أنا لا حابه أكون تريند ولا صحافة تكلمني ولا تستضيفني ولا أي حاجة من الكلام دا خالص، أنا أبسط من كدا والله العظيم، بحمد ربنا على تخرجي وإني قدرت أحقق جزء صغير من مجالي، وبتمني إني أوصل بمجهودي مش بتريند ولا بأي طريقة مترضينيش وتتعبني نفسيا، ومش لازم أكون في طب عشان والدي سيفرح بيا.
وتابعت: آخر حاجة أحب أقولها بلاش تدخلوا في حياه الناس، محدش عالم الناس دي بتمر بإيه، وكسره القلوب صعبة أوي وربنا، ولا سامحكم الله ولا عفا عنكم ياللي شتمتوني وهنتوني بجد، أنا خصيمة أي حد شتمني، وقال في حق أهلي كلمة وحشة، وشكرا لكل اللي دافع عني وأولهم صحابي ودفعتي وقرايبي.
