أبرز تصريحات عمر الشناوي: اشتغلت صبي مقاول وعمري 8 سنين والتمثيل لم يخطر على بالي
تحدث الفنان عمر الشناوي عن دوره في مسلسل مذكرات زوج الذي عرض في الموسم الرمضاني الماضي 2023، إلى جاني حديثه عن زيجاته، وأحب الأعمال لقلبه وغيرها من الأمور.
وقال عمر الشناوي خلال لقائه في برنامج الستات مايعرفوش يكذبوا، إلى أنه كان يشعر بالقلق من الشبه الكبير بين الشخصية التي قدمها في المسلسل عن دور الفنان احمد رمزي في فيلم عائلة زيزي.
وأضاف عمر الشناوي: حسيت الشخصية قريبة من شخصية أحمد رمزي في الفيلم ونفس طريقة التعامل مع الحب، وخفت ألعبه بشكل مش حلو أو دمه تقيل خاصة أن الشخص اللعبي بيتكره مش بيتحب.
وتابع عمر الشناوي: اشتغلت مع المخرج كتير على الشخصية وكان مهتم بتفاصيل كتير وزقني من الاتجاه اللي عاوز أروح له.
وعن تعاونه مع طارق لطفي في مذكرات زوج قال: كنا بنصور في وقت ضيق وما لحقناش نقعد مع بعض بره التصوير وما حصلش صداقة كان على قد المشاهد، لأن ظروف الشغل كانت مزنوقة.
عمر الشناوي يتحدث عن مسلسلي كلبش والأب الروحي
وكشف عمر الشناوي أن مسلسلي كلبش والأب الروحي كانا سببًا في نجاحه الفني وشهرته خاصة مسلسل كلبش، قائلًا: كلبش حصل بسببه انتشار مرعب وفاض على الجميع بالنجاح والواحد ما كانش متوقعه، وقبلها عملت الأب الروحي وعمل نجاح كويس وانتقلت من نجاح على نجاح أكبر منه.
كما كشف عمر الشناوي أكثر شيء يزعجه في الحياة قائلًا: أكتر حاجة بتضايقني أني لما أحب شخص وادي له اهتمام وهو بياخد ده كأنه أمر مسلم به، دي أكتر حاجة توصلني لمرحلة صعبة، وأكتر شيء يسعدني في الحياة أن ابني يضحك لي ودي بالنسبة لي بالدنيا كلها.
وكشف عمر الشناوي أن التمثيل كان بعيد عنه ولا يخطر بباله، مضيفًا: ما كنتش حاطط موضوع التمثيل في بالي وواحد صاحبي قال لي جرب.
عمر الشناوي يتحدث عن زيجاته
وتحدث عمر الشناوي عن زيجاته، مشيرًا إلى أن شخصية يوسف هي أكثر شخصية تشبهه في مرحلة عمرية سابقة، قائلًا: كنت متجوز قبل هند تلات سنين فقط، وبعدها عشت فترة تخبطية وحصل لي ارتباك فكري لأن تفكيري عن الزواج كان نموذجي وكنت عاوز أتجوز وأعمل أسرة ولما اتجوزت ما حصلش خاصة أني كنت باني توقعات أكبر من اللي حصل بكتير، وكنت متخبط ومش عارف ارسى لحد ما جت هند وحبيتها لأنها كانت حقيقية جدا وجميلة ومش عندها تلاعب ولا في الكلام ولا الفكر اللي عاجبها عاجبها واللي مش عاجبها مش عاجبها وحبيت أهلها جدًا.
وكشف عمر الشناوي أن مهنته الحقيقة هي الهندسة المعمارية، قائلًا: أنا مهندس معماري وفي مرحلة الجامعة سافرت بره مصر واشتغلت شغلانات أخرى وأنا عمري 8 سنين كنت بساعد بابا في الشغل لأنه كان شغال في المقاولات وأنا كنت صبي مع الناس اللي في الموقع وهو علمني وبهدلني في نفس الوقت ولكن اتعلمت الصنعة بجد.
وأضاف: كنت بحب والدي وعاوز أكون زي وشايفه المثل الأعلى ودخلت عمارة لأن أبويا كان مهندس معماري وكان حب رباني من غير سبب ولما كبرت بدأت أشوف أنا عاوز إيه واكتشفت أني مش مرتاح في العمارة وفي الفترة دي حبيت التمثيل.
