قالي هتجوز مراتك.. المتهم بإنهاء حياة منجد المعادي: قتلته ونزلت القهوة أشرب شيشة
كشفت التحقيقات في القضية رقم 12126 لسنة 2023 جنايات حلوان، والمعروفة إعلاميا بـ منجد المعادي، تفاصيل مقتل شاب يدعى أيمن عابد، مؤكدة وجود علاقة عاطفية بين المجني عليه والمدعوة أ.ي، زوجة المتهم بقتل المجني عليه سيد.س، وعقب اكتشاف زوجها وجود تلك العلاقة، قرر التخلص من المذكور وإزهاق روحه.
التحقيقات في قضية مقتل منجد المعادي
وحصل القاهرة 24 على نص التحقيقات في القضية، وجاءت أقوال المتهم كالتالي: لما عرفت ان مراتي على علاقة بالمجني عليه قولت هتكلم مع أيمن عابد منجد المعادي في حته قريبة من المنطقة لان احنا اللي سكانين في المنطقة فيها اخواته وهيتدخلوا والموضوع هيكبر وخوفت إن هما هياذوني علشان عيلته ناس شديده وفيها مسجلين وأنا على الله.
وتابع المتهم: أنا قولت ممكن أخليه يقابلني في منطقة بعيده عن كوتسيكا وطره، فقولت أنا ممكن أقابله في حدائق حلوان لأن أنا كنت مأجر شقة هناك علشان لو هتنفصل هروح اقعد فيها لوحدي، وفعلا اشتريت تلفون بخط جديد وكلمته على أساس إني زبون وعايز يعمل حاجة في عفش بيته في حدائق حلوان وكلمته وخليته جالي في المنطقة اللي فيها الشقة ونزلت قابلته تحت في الشارع اللي أنا مأجر فيه الشقة وفهمته إن أنا اللي متصل بيه علشان محتاجين نتكلم شوبة بخصوص علاقته بمراتي وهو تحت في الشارع قالي مفيش حاجة من الكلام ده والكلام ده مش صحيح فقولتله طيب تحب نقعد في قهوة ولا نطلع عندي الشقة فوق فقالي نطلع الشقة فوق عندك نتكلم.
وأضاف المتهم: لما طلعنا فوق بدأ أسلوبه في الكلام يتغير وقالي أيوة أنا فيه علاقة بيني وبين مراتك، وأنا غصب عنك أو بمزاجك هطلقها منك واتجوزها فشديت معاه راح زاققني رحت زاقه وقع على رملة في الأرض لقيته بيفتح الشنطة اللي في ايده وبيطلع منها مطواه روحت ناطط عليه وخدت المطواه من ايده وضربته في رقبته كذا ضربة في جسمه من قدام بس مش فاكر فين بالظبط.
وأكمل: لما قومت من عليه حاول إنه يقف بس مقدرش يصلب طوله ووقع على وشه، وأنا كانت جاتلي حالة هستيرية ومكنتش عارف بعمل ايه فضربته كام ضربة في ضهره وهو واقع بعدها لقيته مرمي جثة هامدة، وأنا مش عارف أعمل ايه فقفلت عليه الشقة ونزلت قعدت في قهوه شربت معسل وقهوة بفكر هعمل أي هبلغ ولا أخلص من الجثة إزاي؟
