خالد سرحان يهاجم مادلين طبر بعد تصريحاتها بشأن اقتحام فيلا الزعيم: قلة أدب وهدفها التريند
أعرب الفنان خالد سرحان عن استيائه الشديد من الفنانة مادلين طبر، بعد تصريحاتها المثيرة للجدل بشأن اقتحام الفنانين لـ منزل الزعيم عادل إمام، يوم الاحتفال بعيد ميلاده.
وأكد خالد سرحان في تصريح خاص لـ القاهرة 24، أن وجود الفنانين بمنزل الزعيم عادل إمام يوم عيد ميلاده كان بالاتفاق المسبق مع أسرته، مشيرًا إلى أنهم لم يقتحموا المنزل كما زعمت الفنانة مادلين طبر.
وأوضح خالد سرحان: تصريح مادلين طبرعن الزعيم قلة أدب والست دي هدفها تعمل تريند على اسم عادل إمام، ومفيش الكلام ده ولا اقتحمنا البيت ولا حاجة، إحنا رايحين جايين على الزعيم، وأسرته ممنعتهوش زي ما بيتقال، والأستاذ بيجهز لعمل يرجع بيه للساحة الفنية.
مادلين طبر تثير الجدل بعد تحديثها عن الزعيم عادل إمام
في السياق نفسه أثارت مادلين طبر، ضجة كبيرة في وقت سابق بعد تصريحها بشأن الزعيم عادل إمام، إذ قالت خلال لقاء سابق مع القاهرة 24 على هامش حفل ختام المهرجان القومي للمسرح: الزعيم عادل إمام تاج على رأسنا، وكان أمنيتي أن عائلته تفرج عنه ويحضر تكريماته، تصوروا حضر هيحصل إيه هنستقبله على رموش عنينا، إنما التكريم بعدم وجوده حلو واحترام من محمد رياض ابن الناس المحترمين ولكن لا يكفي لازم يحضر.
وتابعت مادلين طبر: الرقم اللي كان الزعيم بيرد عليه لما كان بصحته مبقاش يرد عليه، ورامي ابنه مبيردش خالص طيب نتطمن على الزعيم إزاي؟ لازم نقتحم الفيلا، والناس اللي اقتحموا بيته وعرفوا يعملوا له عيد ميلاد برافو عليهم وده المهم.
محمد رياض يعلق على تصريحات مادلين طبر: كانت المفروض ترجعلي قبل ما تقول كده
وسبق، وعلق محمد رياض في تصريحات سابقة لـ القاهرة 24، على تصريحات مادلين طبر، مؤكدًا أنه لم يدع الزعيم عادل إمام لحضور مهرجان القومي للمسرح القومي، ولكنه فقط أطلق الدورة الـ 16 من المهرجان باسم الزعيم احتفالًا بمسيرته المسرحية، موضحًا: الكلام ده مكنش ينفع يتقال، وكانت المفروض ترجعلي قبل ما تقوله.
وأردف رياض: مادلين طبر مدعوة زي كل المدعويين، وأنا مطلبتش من الزعيم عادل إمام أنه يحضر المهرجان ولا طلبت حد من أسرته، ومقدمتش تكريم ولا درع للزعيم، أنا أطلقت الدورة باسمه ودا أعلى من التكريم مليون مرة، وهو اتكرم بالفعل في المهرجان قبل كدا.
وختم محمد رياض حديثه قائلًا: ياريت يا جماعة نقفل الموضوع ده، سيرة الزعيم المقصود بيها أغراض تانية، لازم نحافظ على الراجل بتاعنا يا جماعة، الزعيم قمية كبيرة.
